आष्टा (सांगली)- पेट्रोल पंपावर खासगी वाहनधारकांची गर्दी करून त्यांना पेट्रोल-डिझेलची विक्री करून जिल्हाधिकाऱ्यांच्या आदेशाचा भंग केल्याचा प्रकार येथील मे.एन ए रुकडे पेट्रोलपंपावर घडला. याप्रकरणी पेट्रोल पंपचे मालक आप्पासाहेब नाभीराज रुकडे व व्यवस्थापक राजू नर्गिस नायर (रा. फाळकेवाडी) यांच्यावर आष्टा पोलीस ठाण्यात गुन्हा नोंद झाला आहे. याप्रकरणी सहाय्यक पोलीस फौजदार संजय सनदी यांनी फिर्याद दिली आहे. 

पोलिसांनी दिलेली माहिती अशी, "कोरोना' या विषाणूचा संसर्ग व प्रादुर्भाव लक्षात घेऊन त्यावर तत्काळ नियंत्रण करण्यासाठी जिल्हा प्रशासनाने गर्दी टाळण्याचे आवाहन केले आहे. गेले काही दिवस पेट्रोल पंपावर गर्दी होत असल्याचे पाहून प्रतिबंधात्मक उपाय म्हणून जिल्हाधिकारी डॉ. अभिजीत चौधरी यांनी 25 मार्चपासून 31 मार्च पर्यंत सांगली जिल्ह्यातील सर्व पेट्रोल पंपावर अत्यावश्‍यक सेवा वगळता अन्य वाहनांना पेट्रोल-डिझेल विक्री करण्यास बंदी लागू केली आहे. त्याबाबत सर्व पेट्रोल पंप चालकांना आदेश दिले आहेत. या आदेशाची अंमलबजावणी करण्यास टाळाटाळ केली तर कारवाईचा इशारा देखील दिला आहे. 

आष्टा पोलीस ठाण्याचे सहाय्यक पोलीस निरीक्षक समीर ढोरे, सहाय्यक फौजदार संजय सनदी हे सोमवारी (ता.29) पेट्रोलिंग करत असताना आष्टा परिसरातील मे. रुकडे पेट्रोल पंपावर वाहनधारकांची गर्दी झाली होती. अत्यावश्‍यक सेवेतील कर्मचारी वगळता इतर दुचाकी आणि चार चाकी खासगी वाहन चालकांना पेट्रोल वितरण करत असल्याचे पोलिसांच्या निदर्शनास आले. पोलिसानी व्यवस्थापक राजू नायर यांच्याकडे चौकशी केली असता त्याने पोलिसांच्याकडे दुर्लक्ष करीत पेट्रोल भरणे सुरूच ठेवले. त्यामुळे पोलिसांनी पेट्रोल पंप मालक व व्यवस्थापक यांच्यावर जिल्हाधिकारी यांच्या आदेशाचा भंग केल्याचा गुन्हा दाखल करण्याची कारवाई केली.

पेट्रोल-डिझेल विक्री सुरू केल्याप्रकरणी पंपाचे मालक आप्पासाहेब रुकडे व व्यवस्थापक राजू नायर यांच्यावरती भारतीय दंड विधान 1860 चे कलम 188 व आपत्ती व्यवस्थापन कायदा 2005 चे कलम 51 नुसार गुन्हा नोंद केला आहे. पोलिसांनी केलेल्या कारवाईची आष्टा परिसरात चर्चा रंगली आहे.