सातारा - इयत्ता दहावीचा निकाल आज (शुक्रवार) लागला. राज्यातील सर्व जिल्ह्यांत निकालाची टक्केवारी उत्तम असल्याने विद्यार्थी व पालकांमध्ये उत्साहाचे वातावरण आहे. अभ्यासक्रमातील बदल, तोंडी परीक्षा न घेण्याचा झालेला निर्णय यामुळे आगामी शैक्षणिक 2018-19 वर्षापासून शिक्षकांबरोबरच विद्यार्थ्यांची कसोटी लागणार आहे. जिल्ह्यातील एका शाळेचा निकाल 100 टक्के लागला आहे. त्यापैकी 99 टक्के विद्यार्थ्यांना 50 पेक्षा जादा टक्के मिळाले आहेत. केवळ एकच विद्यार्थी 36 टक्‍क्‍यांवर उत्तीर्ण झाला आहे. आगामी शैक्षणिक वर्षांत तोंडी (20 गुणांची) परीक्षा ऐवजी 100 गुणांची लेखी परीक्षा घेतली जाणार आहे. परिणामी तोंडी परीक्षेचे सध्या मिळणाऱ्या गुणांमध्ये फरक पडेल असे ही म्हटले जात आहे. यामुळे वैयक्तिक टक्केवारीचा फुगा फुटेल; परंतु, उत्तीर्ण होणाऱ्यांची संख्येवर फारसा परिणाम होणार नाही, असे शैक्षणिक क्षेत्रातील जाणकारांचे मत आहे. 

दरम्यान, राज्य माध्यमिक व उच्च माध्यमिक शिक्षण मंडळातर्फे घेतलेल्या दहावी परीक्षेच्या निकालात कोल्हापूर विभागात सातारा जिल्ह्याचा 93.43 टक्के निकाल लागला आहे. या विभागात कोल्हापूर जिल्ह्याचा निकाल 95.35 टक्के, तर सांगली जिल्ह्याचा निकाल 92.25 टक्के इतका लागला आहे. इयत्ता दहावीचा निकाल आज (शुक्रवारी) दुपारी एक वाजता ऑनलाइन पद्धतीने जाहीर झाला. हा निकाल पाहण्यासाठी विद्यार्थी व पालकांची सायबर कॅफेत गर्दी झाली होती. अनेक जण निकालाची प्रिंट काढून घेत होते. विद्यार्थी ही एकमेकांना शुभेच्छा देताना दिसत होते. शहरातील मिठाई विक्रेत्यांच्या दुकानात पेढे घेण्यासाठी ही गर्दी होती. दरम्यान दहावीच्या परीक्षेसाठी यंदा सातारा जिल्ह्यात 43 हजार 071 विद्यार्थी बसले होते. त्यापैकी 40 हजार 241 विद्यार्थी उत्तीर्ण झाले आहेत. यामध्ये 12 हजार 534 विद्यार्थी विशेष श्रेणीत, 14 हजार 238 विद्यार्थी प्रथम श्रेणीत, तर 10 हजार 801 विद्यार्थी द्वितीय श्रेणीत, तसेच दोन हजार 668 विद्यार्थी उत्तीर्ण झाले आहेत. दहावीच्या निकालात जिल्ह्यात यंदा मुलींनीच बाजी मारली असून, 95.36% मुली उत्तीर्ण झाल्या आहेत, तर मुलांची उत्तीर्णतेची टक्केवारी 91.81 इतकी आहे. 

तालुकानिहाय निकाल 
जावळी - 95.57, कऱ्हाड 93.14, खंडाळा - 94.33, खटाव - 94.70, कोरेगाव - 93.59, माण - 95.48, महाबळेश्‍वर - 95.69, फलटण - 89.72, पाटण - 92.87, सातारा - 93.10, वाई - 95.18