सांगली : हिवाळ्यात गुलाबी थंडीची चाहूल लागताच स्वेटर, कानटोप्या खरेदीसाठी बाजारपेठेत ग्राहकांची वाढती मागणी आहे. लहानांपासून थोरांपर्यंत प्रत्येकजण आपल्या आवडीनुसार स्वेटर खरेदी करताना दिसतो. जुन्या पद्धतीच्या तुलनेत नव्याने बाजारपेठेत अवतरलेल्या पॅटर्नसाठी वाढती मागणी आहे.

दीपावलीदरम्यान सुरू होणाऱ्या हिवाळ्यात गुलाबी थंडीची प्रतिवर्षी चाहूल लागते. यावेळी गारठ्यापासून शरीराचे संरक्षण करण्याकरिता स्वेटर, कानटोप्या व मफलर अशा ऊबदार कपड्यांचा आधार घेतो. त्याच्याच खरेदीसाठी सध्या बाजारपेठेत गर्दी होत आहे.

जुन्या पद्धतीच्या स्वेटरच्या तुलनेत ग्राहकांनी फेदर वूलन, लोकर व जर्किन अशाप्रकारच्या फॅन्सी स्वेटरला पसंती दिली आहे. परराज्यांतून त्यासाठीची आवक मोठ्या प्रमाणात होत असून स्वेटर शर्ट या स्वेटअर प्रकाराला अधिक मागणी आहे.

लहान व तरुण मुले आणि मुलींसह पुरुष आणि स्त्रिया अशा सर्वांसाठी त्याची निर्मिती असल्यामुळे खरेदीसाठी ग्राहकांचा अधिक कल आहे. त्याद्वारेच त्यांना फॅन्सी डिझाइन, तसेच आकर्षक रंगाचे विविध स्वेटर पाहावयास मिळतात. ग्राहकांची पसंती जाणत त्यांना स्टॉलधारक त्यांना सेवा देण्यात दिवसभर व्यस्त असतात. सकाळी साडेनऊपासून रात्री दहापर्यंत स्वेटर आणि कानटोप्या खरेदीसाठी ग्राहक येतात. मुख्य बाजारपेठ व जागोजागी स्टॉल उभारून विक्री सुरु आहे. कामगार नेमून तीन महिन्यांसाठी हा व्यवसाय तेजीत असतो.

जुन्या लोकरीच्या स्वेटरचे महत्त्व

आजकालची तरुणाई थंडीपासून बचावासाठी फॅन्सी स्वेटर, कानटोप्यांकडे वळली असली, तरीही जुन्या लोकरीच्या स्वेटरचे महत्त्व कमी झाले नाही. त्यांना जाणकारांकडून आग्रही मागणी आहे. अत्यंत ऊबदार गुणधर्मामुळे ते विक्रीसाठी ठेवणे भाग आहे.

दरांवर एक दृष्‍टिक्षेप...

• स्वेटर दर - साधारण २०० पासून ८०० पर्यत

• कानटोप्या - साधारण ५० पासून १५० पर्यत

• हॅन्डग्लोज - साधारण ७० पासून १२० पर्यत

• मफलर - साधारण १०० पासून २०० पर्यत

• जर्किन - साधारण ३५० पासून ६०० पर्यत

• लहान मुलांचे स्वेटर - साधारण १५० पासून पुढे

  #ElectionWithSakal