नगरः पोलिसात अत्याचाराची तक्रार दिल्याच्या रागातून पाथर्डी तालुक्‍यातील दाम्पत्याचे येथील जिल्हा रुग्णालयासमोरून अपहरण करण्यात आले. अज्ञात स्थळी नेऊन दोघांना विवस्त्र करून, अंगावर पेट्रोल टाकून बेदम मारहाण करण्यात आली. या मारहाणीचे चित्रीकरण "व्हायरल' करण्यात आले.

याबाबत पीडित विवाहितेच्या फिर्यादीवरून आज पहाटे तोफखाना पोलिसांनी दहा जणांविरोधात गुन्हा दाखल केला. विशेष म्हणजे पीडितेचा सख्खा भाऊ, दीर, चुलत सासरे, चुलत दीर यांच्यासह 10 जणांचा आरोपींमध्ये समावेश आहे. त्यातील पाचजणांना अटक करण्यात आली आहे.

ते आरोपी पोलीस म्हणवून घेत होते
फिर्यादीनुसार, पाथर्डी तालुक्‍यातील दाम्पत्य 24 फेब्रुवारी रोजी सायंकाळी जिल्हा रुग्णालयाजवळ एका रिक्षात बसले. त्या वेळी रिक्षातील एकाने पीडिता व तिच्या पती काहीतरी हुंगवून बेशुद्ध केले. नंतर त्यांना अज्ञात स्थळी एका खोलीत बंद केले. पीडितेचा सख्खा भाऊ, दीर, चुलत सासरे, चुलत दीर यांच्यासह दहा जण तेथे आले. त्यांतील दोघे स्वत:ला पोलिस म्हणवून घेत होते.

निंबळक बाह्यवळण रस्त्यावर अपहरण 
दरम्यान, पीडित महिलेने 2015मध्ये अत्याचाराची फिर्याद दिली होती. पीडितेने याच आरोपींविरोधात विविध फिर्यादी दिल्या आहेत. काही दिवसांपूर्वी एमआयडीसी पोलिस ठाण्यात दिलेल्या फिर्यादीत तिने म्हटले होते, की निंबळक बाह्यवळण रस्त्यावर अपहरण झाले. नंतर विवस्त्र करीत एका पोत्यात घालून मारहाण केली व रेल्वेमार्गावर टाकून दिले.

या प्रकरणी पोलिसांनी पाच आरोपींना चौकशीसाठी बोलाविले होते. त्यानंतर त्यांना अटक करण्यात आली. अहवाल जिल्हा पोलिसांनी आज दुपारी गृह मंत्रालयाकडे पाठविला आहे.

नातेवाईकच आहेत आरोपी 

या प्रकरणामुळे विरोधकांनी पोलीस प्रशासन व सरकारवरच्या निष्क्रीयतेवर आरोप करीत नागडे करण्याचा प्रयत्न केला. मात्र, या प्रकरणावर गृहमंत्री अनिल देशमुख यांनी निवेदन केले. माध्यमांमध्ये प्रसिद्ध झालेल्या बातम्या आणि वस्तुस्थिती या फार तफावत आहे. वस्तुनिष्ठ अहवाल आला आहे.या प्रकरणात संबंधित महिलेचा भाऊ, वडील, भाचा, दीर आरोपी आहे. असे असले तरी या प्रकरणाची योग्य पद्धतीने चौकशी केली जाईल.