पिंपरी : लॉकडाउनमुळे आपल्याकडील व्यवसाय आणि कामाचे प्रमाण कमी झाल्याचे कारण पुढे केल्यामुळे आयटी कंपन्यांमध्ये काम करणाऱ्या कर्मचाऱ्यांच्या डोक्‍यावर नोकरी जाण्याची टांगती तलवार असतानाच, दुसरीकडे या कर्मचाऱ्यांना नोकरीपासून वंचित व्हावे लागू नये, म्हणून कामगार मंत्रालयातील अधिकारी थेट आयटी कंपनी व्यवस्थापनाबरोबर चर्चा करू लागले आहेत. त्यामुळे पुण्या-मुंबईतल्या आयटी कंपन्यांमधील 300 जणांच्या नोकऱ्या वाचल्या असल्याचे राज्य सरकारच्या माहिती तंत्रज्ञान समितीचे सदस्य पवनजित माने यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप

कोरोनाचा संसर्ग सुरू झाल्यापासून आयटी कंपन्यांनी कर्मचाऱ्यांना वर्क फ्रॉम होमची सुविधा दिली आहे. त्यामुळे गेल्या दीड महिन्यांपासून आयटी कंपन्यांची कार्यालये बंद आहेत. दरम्यानच्या काळात काही कंपन्यांनी आपल्याकडे पुरेशा प्रमाणात काम नाही, त्यामुळे मनुष्यबळ कमी करावे लागू शकते, अशी सूचना कर्मचाऱ्यांना केली होती. त्यामुळे या कर्मचाऱ्यांमध्ये चिंतेचे वातावरण निर्माण झाले होते. काही कर्मचाऱ्यांनी पुढे येत यासंदर्भातील कैफियत कामगार आयुक्‍तांकडे मांडत यामध्ये तत्काळ लक्ष घालून यावर मार्ग काढण्याची विनंती केली होती. 

पुण्याच्या बातम्या वाचण्यासाठी येथे ► क्लिक करा 

दरम्यान, कामगार आयुक्‍त कार्यालयाकडे आलेल्या तक्रारींची योग्य ती दखल घेत कामगार मंत्रालयातील कर्मचाऱ्यांनी संबधित कंपन्यांच्या व्यवस्थापनाबरोबर चर्चा केली. सध्या लॉकडाउनमुळे असणाऱ्या परिस्थितीची कल्पना देत कर्मचाऱ्यांना कामावरुन कमी करण्याचे प्रकार तूर्तात थांबवण्यास सांगितले. त्यामुळे अनेक कंपन्यांनी आपल्या निर्णयामध्ये बदल करत कर्मचाऱ्यांना कमी करणे, पगार न देणे असे निर्णय तूर्तात मागे घेतल्याचे माने यांनी सांगितले. 

कर्मचाऱ्यांनी कैफियत मांडल्यामुळे निघाला मार्ग 

दरम्यान, आयटी कर्मचाऱ्यांनी धाडस दाखवत कामगार आयुक्‍त कार्यालयामधे आपली कैफियत मांडल्यामुळे यामध्ये मार्ग निघाला आहे. कामगार मंत्रालयाच्या अधिकाऱ्यांनी आयटी कंपन्याच्या व्यवस्थापनाबरोबर केलेल्या चर्चेला सकारात्मक प्रतिसाद मिळाल्यामुळे हा तिढा सुटण्यास मदत झाली आहे.