पिंपरी - शहरात कोरोनाचे ३३ रुग्ण सक्रिय आहेत, त्यामुळे नागरिकांनी काळजी घेण्याचे आवाहन महापालिकेच्या वैद्यकीय विभागाच्या वतीने करण्यात आले आहे. या सर्व रुग्णांना कोरोनाची सौम्य लक्षणे असून, त्यातील ३२ रुग्णांना घरीच विलगीकरणात ठेवण्यात आलेले आहे तर उर्वरित एका रुग्णावर आकुर्डी येथील महापालिका रुग्णालयात उपचार सुरू आहेत. मात्र, नव्याने आढळलेल्या कोरोनाच्या जेएन १ या व्हेरियंटची लक्षणे या रुग्णांमध्ये नाहीत.

सर्दी खोकल्याचेही रुग्ण वाढले

गेल्या महिन्यापासून शहरात थंडी वाढलेली आहे, वातावरणही बदलत आहे. त्यामुळे शहरात सर्दी खोकल्याच्या रुग्णांची संख्या वाढत आहे. गेल्या दोन आठवड्यात ही संख्या लक्षणीयरित्या वाढली असून, गरज वाटल्यास या रुग्णांचीही कोरोनाची तपासणी केली जात आहे. बहुतांश चाचण्या या नकारात्मक येत आहेत. मात्र, ज्यांना कोरोना झालेला आहे, त्यांच्यामधील लक्षणेही सौम्य असल्याने घाबरून न जाता काळजी घेण्याचे आवाहन डॉक्टरांनी केलेले आहे.

अशी घ्या काळजी

- सर्दी खोकला झाल्यास डॉक्टरच्या सल्ल्याने औषधोपचार घ्यावेत

- बाहेर पडताना व गर्दीच्या ठिकाणी मास्क वापरावे

- सर्दी खोकला झालेल्यांनी बाहेर पडणे टाळावे

- सोशल डिस्टंसिंग पाळावे

- सॅनिटायझरचा वापर करावा

महापालिकेच्या रुग्णालयात तयारी

नव्याने आढळलेल्या कोरोनाच्या जेएन १ या व्हेरियंटचा शहरात एकही रुग्ण नाही. मात्र, कोरोनाच्या रुग्णांची संख्या वाढल्याने महापालिकेचा वैद्यकीय विभागाची यंत्रणा सज्ज झाली आहे. महापालिकेच्या शहरातील आठ रुग्णालयांमध्ये संशयित रुग्णांची कोरोना चाचणी करण्यात येत आहे.

ऑक्सिजन, औषधांचा साठा यांची चाचपणी करण्यात आलेली असून, गरज पडल्यास या रुग्णालयातही कोरोनाच्या रुग्णांसाठी बेडस् उपलब्ध करून दिले जातील, असे महापालिकेच्या वतीने सांगण्यात आलेले आहे.

सध्या कोरोनाचा संसर्ग झालेल्या रुग्णांना सौम्य लक्षणे असल्याने त्यांच्यावर घरीच उपचार सुरू आहेत. एका रुग्णावर आकुर्डी येथील महापालिका रुग्णालयात उपचार सुरू आहेत. सध्या महापालिकेच्या वतीने या रुग्णालयातच कोरोनाच्या रुग्णांना भरती केले जात आहे. मात्र, भरती होणाऱ्या रुग्णांची संख्या वाढल्यास इतर रुग्णालयातही वॉर्ड सुरू करण्यात येईल.’

- डॉ. श्रीकांत सुपेकर, वैद्यकीय अधिकारी