पिंपरी, - 'मला भाई का नाही म्हणाला' या कारणावरून सराईत गुन्हेगाराने (Criminal) व त्याच्या साथीदारांनी थेरगावातील गणेशनगर येथे एकाला इमारतीच्या टेरिसवर नेऊन कमरेचा बेल्ट व लाथा बुक्क्यांनी अमानुष मारहाण (Beating) केली. जमिनीवर बुस्किटे (Biscuits) टाकून खाण्यास भाग पाडले. या गुन्ह्यातील तीन आरोपींना अटक (Arrested) करून पोलिसांनी त्यांची धिंड काढली.

प्रशांत आठवडे (रा. शिवकॉलनी, गणेशनगर, थेरगाव ), आदित्य काटे (रा. ताथवडे ), प्रकाश इंगोले अशी अटक केलेल्या आरोपींची नावे असून रोहन वाघमारे अद्याप फरार आहे. याप्रकरणी वीस वर्षीय तरुणाने फिर्याद दिलेली आहे. आरोपी व फिर्यादी हे दोघे ऐकमेंकांच्या ओळखीचे आहेत. आरोपी रोहन याने फिर्यादीला फोनवर शिवीगाळ करून भेटण्यासाठी बोलविले. त्यानुसार फिर्यादी मंगळवारी (ता. २५) रात्री साडे अकराच्या सुमारास गणेशनगर आले.

रोहन तू का मला फोनवर शिवीगाळ केली. अशी विचारणा फिर्यादीने आरोपीला केली. याचा आरोपीला राग आला. व 'तू मला रोहन का म्हणालास , मला भाई का नाही म्हणाला, मी या एरियाचा भाई आहे' असे म्हणत फिर्यादीला शिवीगाळ केली. तसेच कमरेच्या बेल्टने मारहाण करीत जमीनीवर टाकलेली बिस्किटे खाण्यास भाग पाडले. दरम्यान, इतर आरोपींनीही फिर्यादीला शिवीगाळ करीत बेल्टने व लाथाबुक्क्यानी बेदम मारहाण केली. यामध्ये ते जखमी झाले. तसेच त्यांना जीवे मारण्याची धमकी दिली. याप्रकरणी वाकड पोलिस ठाण्यात गुन्हा दाखल करण्यात आला. त्यानंतर पोलिसांनी तिघांना अटक केली. या आरोपींची रविवारी (ता. ३०) घटना घडलेल्या परिसरातून धिंड काढण्यात आली.

दरम्यान, आरोपींना तपासकामी घटनास्थळी आणले होते, अशी माहिती वरिष्ठ निरीक्षक डॉ. विवेक मुगळीकर यांनी दिली.