जुनी सांगवी : "वास्तुशांती करून मंगळवारी (ता. 9) गृहप्रवेश केला. अन्‌ दुसऱ्या दिवशी बुधवारी (ता. 10) डोळ्यांसमोर आमच्या स्वप्नांचा चुराडा झाला,'' असे सांगत ममतानगर येथील रहिवासी लीलावती बलराज संजना धाय मोकलून रडत होत्या. मूळ हैदराबादेतील असलेले हे तेलुगू कुटुंब 40 वर्षांपासून कामानिमित्त शहरात आले आहेत. नऊ सदस्य असलेल्या या कुटुंबात कोणीही सरकारी नोकरी किंवा व्यवसायात नाही, मोलमजुरी करून त्यांनी कष्टाने घर उभारले होते. 

- ताज्या बातम्यांसाठी डाऊनलोड करा ई-सकाळचे ऍप

- कारवाई थांबली, पण भीती कायम; भोसरी रेडझोनमधील नागरिकांची भावना 

लीलावती यांचा तीन मुलांचा एकत्रित परिवार आहे. यात एक रिक्षाचालक, एक मुलगा अपंग; तर तिसरा खासगी कामे करतो. तिघांनी पैसे जोडून जागा घेत घर बांधले. आयुष्यभराची सर्व जमापुंजी व कर्ज काढून घरावर लावली. त्या जागेत त्यांनी काही वर्षे पत्रा शेडमध्ये राहून काढली. आता नव्या घरात ते राहणार होते, मात्र, एवढ्या दिवसांचे बघितलेले स्वप्न दोन दिवसात जमीनदोस्त झाले. आता जायचे कुठे, राहायचे कसे? असे अनेक प्रश्‍न या कुटुंबाला पडले आहेत. 

संसार ढिगाऱ्याखाली... 
कारवाईदरम्यान, संजना परिवाराला घरातील साहित्य बाहेर काढायला ही वेळ मिळाला नाही. संपूर्ण संसार ढिगाऱ्याखाली गाडल्याने केवळ अंगातील कपड्यानिशी त्यांना बाहेर निघावे लागले. जमीनदोस्त झालेल्या घरासमोरच संजना कुटुंबीय हताशपणे बसले होते. 

मधुबन सोसायटीमध्ये पाच इमारतींवर कारवाई 
महापालिका अतिक्रमणविरोधी पथकाकडून बुधवार आणि गुरुवारी (ता. 11) बेकायदा बांधकामावर कारवाई करण्यात आली. दोन दिवसात एकूण 17 बांधकामे पाडली. मधुबन सोसायटी परिसरातील पाच इमारतींवर गुरुवारी कारवाई करण्यात आली. 

घरातील सर्व साहित्य, मुलांची शाळेची कागदपत्रे व इतर महत्त्वाचे कागदपत्रे ढिगाऱ्याखाली गाडले गेले आहे. साहित्य काढायलाही वेळ मिळाला नाही. रात्र नातेवाइकाकडे काढावी लागली. आता बेघर झाल्याने काय करावे, कुठे जावे, सुचत नाही? 
- प्रवीण संजना, रिक्षाचालक 
 

- पिंपरी-चिंचवडच्या बातम्या वाचण्यासाठी येथे ► क्लिक करा

(संपादन : शिवनंदन बाविस्कर)