पिंपरी : वारंवार पेहराव बदलून तब्बल सतरा वर्षे पोलिसांना गुंगारा देणाऱ्या अट्टल दरोडेखोराला जेरबंद करण्यात अखेर गुन्हे शाखा युनिट पाचच्या पथकाला यश आले आहे. या गुन्हेगारावर राज्यातील विविध पोलिस ठाण्यात गंभीर स्वरूपाचे तब्बल वीस गुन्हे दाखल आहेत. 

पुण्याच्या आणखी बातम्या वाचण्यासाठी येथे क्लिक करा 

रघुवीरसिंग चंदुसिंग टाक (वय 51, रा परतूर जि. जालना) असे अटक केलेल्या गुन्हेगाराचे नाव आहे. 27 जुलै 2003 ला पहाटे सव्वा तीन वाजता आरोपींनी देहूरोड येथील धनराज केसरीमल सोनिगरा यांच्या सोनिगारा ज्वेलर्स या दुकानावर दरोडा टाकला. त्यांच्या मुलीच्या गळ्याला चाकू लावून 21 तोळे सोन्याचे दागिने व आठ लाख 50 हजारांची रोकड लंपास केली होती. याबाबत देहुरोड पोलिस ठाण्यात दरोड्याचा गुन्हा दाखल आहे. रघुविरसिंग हा मागील सतरा वर्षांपासून फरारी होता. सतत पेहराव बदलून पोलिसांना गुंगारा द्यायचा. गुन्हे शाखा युनिट पाचचे पथक त्याच्या मागावर होते.

दरम्यान, तो जालना येथे असल्याची माहिती पथकाला मिळाली. त्यानुसार पोलिसांनी सापळा रचून अखेर बुधवारी (ता.29) त्याला जालना येथून ताब्यात घेतले.  त्याच्यावर जालना येथे आठ, औरंगाबाद, अकोला, नागपूर, बीड, मुंब्रा व पुण्यातील चत:श्रृंगी येथे प्रत्येकी एक, तर वाशिम दोन व बीड येथे चार गुन्हे दाखल आहेत. यामध्ये दरोडा, लूटमार, घरफोडी, शस्त्र बाळगणे यासारख्या गंभीर गुन्ह्यांचा समावेश आहे.

ही कारवाई युनिट पाचचे वरिष्ठ निरिक्षक बाळकृष्ण सावंत, सहाय्यक पोलिस निरीक्षक राम गोमारे, कर्मचारी फारुक मुल्ला, राजकुमार ईघारे, दयानंद खेडकर, भरत माने, धनराज किरनाळे, दत्तात्रय बनसोडे, सावन राठोड, संदीप ठाकरे, मयुर वाडकर, ज्ञानेश्‍वर गाडेकर, स्वामीनाथ जाधव, नितीन बहिरट, शामसुंदर गुट्टे, गणेश मालुसरे, धनंजय भोसले, गोपाळ ब्रह्मांदे यांच्या पथकाने केली.

पुण्यातील 100 वर्षांच्या आजींनी कोरोनाला हरवले

असाही योगायोग 
सतरा वर्षापुर्वी 29 जुलैला दरोड्याची घटना घडल्यानंतर आरोपी फरारी होता. त्याला तब्बल सतरा वर्षांनी जेरबंद करण्यात यश आले. दरम्यान, जेरबंद केल्याची तारीखही 29 जुलैच असल्याने आरोपीच्या अटकेचाही योगायोगच असल्याचे बोलले जात आहे.