पिंपरी : रस्त्यावरील वाहने अडवून दिसेल त्या वाहनावर कोयते मारत दोघांनी दहशत माजवली. यामध्ये एका तरुणावर प्राणघातक हल्लाही केली. ही घटना पिंपळे निलखमधील टकले चौक येथे भररस्त्यात घडली. या घटनेमुळे परिसरात भीतीचे वातावरण पसरले.

प्रतीक संतोष खरात, चेतन जावरे (दोघेही रा. पिंपळे निलख) अशी आरोपींची नावे आहेत. याप्रकरणी जितेंद्र छोटीलाल ठाकूर (वय २३, रा. नदी पात्रालगत पत्र्याच्या शेडमध्ये टकले चौक, पिंपळे निलख, मूळ-झारखंड) यांनी फिर्याद दिली आहे.

शनिवारी (ता. ३) रात्री नऊच्या सुमारास फिर्यादी हे त्यांच्या रूममध्ये जेवण बनवत असताना आरोपी त्यांच्याकडे पाणी पिण्यासाठी आले. यावेळी आरोपी जावरे याने फिर्यादीकडे पैसे मागितले असता त्यांनी पैसे देण्यास नकार दिला. त्यावरून खरात याने त्याच्याकडील कोयता फिर्यादीच्या डोक्यात मारून प्राणघातक हल्ला केला. तसेच या आरोपींनी रस्त्यावरील चारचाकी, दुचाकी वाहने अडवून वाहनांवरही कोयते मारले.

वाहनांच्या काचा फोडल्या. आरोपीनी वाहनांचा पाठलाग केला असता काही जणांनी जिवाच्या भीतीने आपली वाहने रस्त्यातच सोडून पळ काढला. तर समोरची घटना पाहून अनेकांनी वाहने रस्त्यातूनच माघारी फिरवली. दहा ते पंधरा मिनिटे आरोपींचा हा राडा सुरु होता. या घटनेमुळे परिसरातील नागरिकांमध्ये प्रचंड दहशत पसरली. याप्रकरणी सांगवी पोलिस ठाण्यात गुन्हा दाखल असून आरोपीना अटक केली आहे.