पिंपरी - पिंपरी-चिंचवडच्या उपमहापौरपदासाठी भाजपच्या हिराबाई उर्फ नानी घुले  यांनी तर, राष्ट्रवादी काँग्रेसचे पंकज भालेकर यांनी उमेदवारी अर्ज शुक्रवारी दाखल केला. मंगळवारी, 23 फेब्रुवारी रोजी सकाळी अकरा वाजता महापालिका भवनातील चव्हाण सभागृहात  निवडणूक होणार आहे. त्यासाठी विशेष सर्वसाधारण सभेचे आयोजन केले आहे. दरम्यान, महापालिकेतील संख्या बळानुसार घुले यांची निवड निश्चित मानली जात आहे. केशव घोळवे यांनी अवघ्या चार महिन्यात राजीनामा दिल्याने रिक्त झालेल्या उपमहापौर पदासाठी निवडणूक होणार आहे. त्यासाठी शुक्रवारी दुपारी तीन ते पाच या वेळेत उमेदवारी अर्ज दाखल करायचे होते. सत्ताधारी भाजपकडून  हिराबाई घुले यांनी नगरसचिव उल्हास जगताप यांच्याकडे अर्ज दाखल केला आहे. महापौर उषा ढोरे, सत्तारुढ पक्षनेते नामदेव ढाके, नगरसेविका सीमा सावळे, शर्मिला बाबर, नगरसेवक सागर गवळी, सुरेश भोईर आदी उपस्थित होते.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

दिघी- बोपखेल प्रभाग क्रमांक चारचे प्रतिनिधित्व हिराबाई घुले करीत आहेत. गेल्या चार वर्षात त्यांना एकही पद मिळाले नव्हते. यावेळी भाजपने त्यांना उपमहापौरपदी संधी दिली आहे. दरम्यान, पिंपरी-चिंचवडच्या उपमहापौरपदासाठी राष्ट्रवादी काँग्रेसचे पंकज भालेकर यांनी अर्ज दाखल केला आहे. विरोधी पक्षनेते राजू मिसाळ, पक्षाचे शहराध्यक्ष संजोग वाघेरे, कार्याध्यक्ष प्रशांत शितोळे, नगरसेवक अजित गव्हाणे, प्रवीण भालेकर, नगरसेविका पौर्णिमा सोनवणे, संगीता ताम्हाणे, सुलक्षणा धर आदी उपस्थित होते. भालेकर हे तळवडे प्रभागाचे प्रतिनिधित्व करीत आहेत.

23 मार्च रोजी होणार प निवडणूक
निवडणुकीसाठी महापालिकेच्या यशवंतराव चव्हाण सभागृहामध्ये मंगळवारी (ता. 23) रोजी सकाळी अकरा वाजता विशेष सभा होणार आहे. पुणे  महापालिकेच्या अतिरिक्त आयुक्त रुबल अग्रवाल निवडणूक निर्णय अधिकारी म्हणून कामकाज पाहणार आहेत.

Edited By - Prashant Patil