पिंपरी - राज्यातील महाविकास आघाडी सरकारतर्फे अर्थमंत्री अजित पवार यांनी अंदाजपत्रक मांडले. त्यात शहर परिसरासाठी काही महत्त्वाच्या योजना आहेत. त्यामुळे महापालिका सर्वसाधारण सभेत राज्य सरकारच्या अभिनंदनाचा ठराव आम्ही मांडला होता. परंतु, सत्ताधारी भाजपने त्याला विरोध दर्शविला. ठराव मंजूर केला नाही. हा कोतेपणा असून, भाजपचे गलिच्छ राजकारण आहे, असा आरोप महापालिका विरोधी पक्षनेते राजू मिसाळ यांनी केला आहे. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

शहराच्या दृष्टीने पुणे-नाशिक रेल्वे मार्गाच्या कामास मान्यता, पुण्याबाहेरून अंदाजे २६ हजार कोटी रुपयांचा १७० किलोमीटर लांबीच्या चक्राकार मार्गाची (रिंगरोड) उभारणी, पिंपरी ते भक्ती-शक्ती मेट्रो प्रकल्पास मान्यता व अंदाजपत्रात भरीव तरतूद इत्यादी कोट्यवधींची तरतूद राज्य सरकारने केली आहे. यासह कोरोना संसर्गांच्या पार्श्‍वभूमीवर महापालिका, नगरपरिषदा व नगरपंचायतीमधील दर्जेदार आरोग्य सुविधेसाठी पाच वर्षांत पाच हजार कोटींची भरीव तरतूद केली आहे. त्यापैकी या वर्षासाठी ८०० कोटी रुपये देणार आहेत. प्रत्येक जिल्हा रुग्णालयामध्ये व वैद्यकीय महाविद्यालयांमध्ये पोस्ट कोविड काऊन्सिलींग व ट्रिटमेंट सेंटर सुरू करण्यात येणार आहेत. या सर्व लोकहिताच्या योजना मांडल्याबद्दल महाविकास आघाडी सरकारच्या अभिनंदनाचा ठराव मांडला होता. परंतु, सत्ताधारी भाजपच्या प्रतिनिधींनी त्याला विरोध दर्शवून राजकीय अपरीपक्वता दाखवून दिली आहे, असे मिसाळ यांनी सांगितले.

Edited By - Prashant Patil