पिंपरी : आधीच कोरोना, त्यात जलजन्य आजारांचा भरणा, अशी स्थिती पिंपरी चिंचवड शहरात निर्माण झाली आहे. शहराच्या बहुतांश भागांमधून दूषित पाणीपुरवठा होत असल्याने कावीळ, उलट्या, अतिसार व पोटदुखी असे अनेक रोगांची लागण झाल्याने नागरिक त्रस्त झाले आहेत. या बाबत पाणीपुरवठा विभागाकडे तक्रारी केल्या आहेत. मात्र, पाणी शुद्ध असल्याचा दावा त्यांनी केला असला, तरी थेरगाव-पडवळनगरमधील एकेका कुटुंबातील चार-पाच जण आजारी पडल्याने नागरिकांनी प्रशासनावर ताशेरे ओढले आहेत. 

ताज्या बातम्यांसाठी डाऊनलोड करा ई-सकाळचे ऍप   

गेल्या काही दिवसांपासून शहरात अतिसाराचे रुग्ण आढळून आल्याने शहरातील 42 ठिकाणाहून नागरिकांनी पाणीपुरवठा दूषित असल्याच्या तक्रारी केल्या होत्या. थेरगाव - पडवळनगरमधील एकेका कुटुंबातील चार-पाच जण आजारी पडले आहेत. नागरिकांनी स्थानिक दवाखान्यात जाऊन तपासणी केल्यावर डॉक्‍टरांनीदेखील पाण्यामुळे कावीळ, गॅस्ट्रो, कॉलरा, अतिसार व साथीचे रोग होत असल्याचे ऍड. सुषमा नामदास स्पष्ट सांगितले आहे. पिण्याचे पाणी कपड्याने गाळून घेतले, तरी ते दूषितच दिसत असल्याची तक्रार प्रमोद शिंदे व देवेंद्र नामदास यांनी केली. 

पिंपरी-चिंचवडच्या बातम्या वाचण्यासाठी येथे ► क्लिक करा

सरिता कांबळे म्हणाल्या, "इतकं गढूळ पाणी असते की प्यायला नको वाटते. आमच्या आळीत प्रत्येक घरातील एक -दोन जण पोटदुखी, अतिसाराने आजारी पडले आहेत. खासगी दवाखान्यातदेखील डॉक्‍टर घेत नाहीत.'' अजिंक्‍य चक्कर म्हणाले, "महापालिकेकडे वारंवार तक्रार केली आहे. परंतु, त्यांनी समाधानकारक उत्तरे दिली जात नाही.'' पावसाळी वातावरणात घरात गढूळ पाण्याच्या पुरवठा होत असल्याचे विशाल बाबर या तरुणाने सांगितले. अशाप्रकारे शहरातील मोशी, चिखली, निगडी, भोसरी, दिघी, रुपीनगर, संभाजीनगर, बोपखेल, तळवडे, पिंपरी, संत तुकारामनगर, सांगवी, शाहूनगर या परिसरात नागरिकांना पाण्यातून बाधा झाली आहे. याच भागातील नागरिकांनी स्वच्छ पाणी मिळावे, यासाठी महापालिकेकडे धाव घेतली आहे. पाणीपुरवठा विभागाकडून शुद्ध पाणीपुरवठा कधी होणार, असा प्रश्‍न अनेकांना पडला आहे.

पुण्याच्या बातम्या वाचण्यासाठी येथे ► क्लिक करा