पिंपरी : 'सरकारकडून जनधन योजनेअंतर्गत पैसे पोस्ट खात्यावर जमा झाले आहेत', ही अफवा पसरल्यामुळे पिंपरी रेल्वे स्टेशन येथील पोस्ट कार्यालयाच्या आवारात 'इंडियन पोस्ट पेमेंट बॅंक' (आयपीपीबी) खाते उघडण्यासाठी खातेदारांनी आज (मंगळवार, ता. 19) मोठी गर्दी केली होती. 

ताज्या बातम्यांसाठी डाऊनलोड करा ई-सकाळचे ऍप

टोकन क्रमांकानुसार येण्याऐवजी अधिकाऱ्यांशी हुज्जत घालत नागरिकांनी सोशल डिस्टन्सिंगचे तीनतेरा वाजवले. पहाटे पाच वाजल्यापासून नागरिकांनी रांगा लावत पुरता गोंधळ केला. गर्दी हाताबाहेर गेल्यावर शेवटी वैतागून काउंटर बंद करण्याची वेळ पोस्ट कार्यालयावर आली. 

सकाळी सहा वाजल्यापासून पोस्ट कार्यालय ते शगुन चौकापर्यंत नागरिकांनी रांग लावली होती. अनेक जण पहाटे पाच वाजल्यापासून नंबरसाठी येऊन थांबले होते. सकाळी दहा वाजता पोस्ट कार्यालय उघडण्यात येते. प्रत्येक दिवशी 30 टोकन दिले जातात, सोमवारी (ता. 18) 107 जणांचे खाते उघडण्यात आले होते. 

पिंपरी चिंचवडच्या बातम्या वाचण्यासाठी येथे ► क्लिक करा

परंतु, सरकारकडून पैसे मिळणार आहेत. जनधन योजनेचे पैसे खात्यावर जमा झाले आहेत. काही ठराविक लोकांचेच पैसे पोस्टात जमा झालेले आहे, अशा विविध अफवा पसरविल्यामुळे ग्राहकांनी प्रचंड गर्दी केली होती. गर्दी इतकी, की सोशल डिस्टन्सिंगचा बोजवारा उडला होता. ज्यांच्याकडे टोकन नव्हते, त्यांनीदेखील गर्दी केली होती. नेमके करावे काय, असा प्रश्‍न कार्यालयावर पडला होता. नागरिक ऐकण्याच्या मनःस्थितीच नव्हते. रांगेत थांबण्यावरून अनेकांचे वाद झाले. पोस्टाने दोन काउंटरची सोय केली आहे, पण नागरिक गोंधळ करत असल्यामुळे आज सकाळपासून फक्त दहा खाती उघडण्यात आली. रोस्टर पद्धतीने कर्मचाऱ्यांना 'ड्यूटी' लावली आहे. नेटवर्कच्यादेखील समस्या आहे, तरीही आम्ही नागरिकांना सहकार्य करत असल्याचे पोस्ट मास्तर यांनी सांगितले.

पुण्याच्या बातम्या वाचण्यासाठी येथे ► क्लिक करा 

"आयपीपीबी खाते उघडण्याचे रूटीन काम आहे. तरीही नागरिकांनी गर्दी केली आहे. सोशल डिस्टन्सिंगचे नियम पाळून खाते उघडण्यात येणार आहे. त्यासाठी टोकन दिले जात आहे. हे खाते उघडल्यावर घरबसल्या तुम्ही सुकन्या, आरडी, पीपीएफ खात्यावर पैसे जमा करू शकता. त्यामुळे ग्राहकांनी विनाकारण गर्दी करू नये.''

- के. एस. पारखी ,जनसंपर्क अधिकारी, पिंपरी चिंचवड पोस्ट कार्यालय