पिंपरी : आनंदनगर. पिंपरी- चिंचवड शहराच्या मध्यवर्ती भागातील ठिकाण. चिंचवड रेल्वे स्टेशन लगत पन्नास वर्षांपूर्वी वसलेली झोपडपट्टी. अनेक धर्म,पंथ, जाती, जमातीतील लोक येथे राहतात. कोणी विदर्भातून आलंय. कोणी मराठवाड्यातून आलंय.

ताज्या बातम्यांसाठी डाऊनलोड करा ई-सकाळचे ऍप

कोणी कर्नाटकातून आलंय तर कोणी तेलंगणातून. रोजंदारी हेच यांचं उदरनिर्वाहाचं साधन. कोणी सुरक्षारक्षक आहे. कोणी कंपनीत कंत्राटी कामगार. कोणी रिक्षा चालवतोय तर कोणी हातगाडी, टपरी लावून दोन पैसे कमावतोय. एका घरात चारपेक्षा अधिक सदस्य आहेत. अशी विविधता असली तरी एकात्मता दिसून येते. सर्व सण-उत्सव आनंदात साजरे करणाऱ्या आनंदनगरवर आज एक संकट आलंय.

पुण्याच्या बातम्या वाचण्यासाठी येथे ► क्लिक करा

जागतिक महामारी कोरोनानं आनंदनगरमध्ये शिरकाव केला आहे. बारा दिवस झाले. कोरोनानं त्यांना झपाटलं आहे. दिवसेंदिवस रुग्ण संख्या वाढते आहे. रविवारी सकाळी ११ पर्यंत येथील रुग्ण संख्या सत्तरच्या वर गेली. आजपर्यंत पाॅझिटीव्ह आढळलेल्या रुग्णांच्या संपर्कात आलेल्या संशयितांना रुग्णालयात दाखल केले आहे. त्यांच्या घशातील द्रवाचे नमुने नॅशनल इन्स्टिट्यूट ऑफ व्हायराॅलाॅजीकडे तपासण्यासाठी पाठवले आहेत. त्यामुळे रुग्ण संख्या आणखी वाढू शकते. या पार्श्वभूमीवर प्रशासनाने येथील संशयितांना रुग्णालयात तर, ज्येष्ठ नागरिक व अन्य संपर्कातील व्यक्तींना शाळेत क्वारंटाइन केले आहे. 

पुण्याच्या बातम्या वाचण्यासाठी येथे ► क्लिक करा

संपूर्ण आनंदनगर कंटेन्मेंट झोन जाहीर केले आहे. वसाहतीत जाणा-या सर्व वाटा पत्रे लावून बंद केल्या आहेत. सर्व ठिकाणी पोलिस बंदोबस्त तैनात आहे. बाहेरील व्यक्तींना आत जाण्यास आणि आतील व्यक्तींना बाहेर जाण्यास मनाई आहे. ही सर्व खबरदारी आनंदनगरमधील नागरिकांच्या भल्यासाठी घेतली आहे. त्यांचा आनंद त्यांना परत मिळवून देण्यासाठी घेतली आहे. 

असे आढळले आनंदनगरचे रुग्ण

तारीख/रुग्ण

१३ मे/२
१४ मे/१
१५मे/१
१६मे/२
१७मे/४

१८मे/१८
१९मे/३
२०मे/५
२१मे/७
२२मे/१२
२३मे/१५
२४मे/१ (दुपारी बारा पर्यंत)

एकूण/७१