वडगाव मावळ : पवन मावळातील कडधे येथील एक ४८ वर्षीय पुरुष कोरोना पॉझिटिव्ह आढळला असल्याची माहिती तहसीलदार मधुसूदन बर्गे यांनी दिली. खबरदारीचा उपाय म्हणून त्याच्या नजीकच्या संपर्कातील सहा व्यक्तींना तपासणीसाठी पाठविण्यात आले आहे. 

ताज्या बातम्यांसाठी डाऊनलोड करा ई-सकाळचे ऍप     

कडधे गाव कंटेन्मेंट झोन म्हणून तर परिसरातील करूंज, येळसे व आर्डव ही गावे बफर झोन म्हणून जाहीर करण्यात आली आहेत. कडधे येथील मूळ रहिवाशी असलेल्या या व्यक्तीला मधुमेहाचा आजार असल्याने तो चिंचवड येथील एका खासगी रुग्णालयात तपासणीसाठी गेला होता. कोरोनाची लक्षणे आढळल्याने त्याचा स्वॅब तपासणीसाठी पाठविण्यात आला होता. तो कोरोना पॉझिटिव्ह असल्याचा अहवाल सोमवारी प्राप्त झाला. तहसीलदार बर्गे, तालुका आरोग्यधिकारी डॉ. चंद्रकांत लोहारे, गटविकास अधिकारी शरदचंद्र माळी यांनी कडधे येथे जाऊन त्याच्या नजीकच्या संपर्कातील सहा व्यक्तींना तपासणीसाठी पाठवून दिले. कडधे गाव कंटेन्मेंट झोन म्हणून जाहीर केले. 

पिंपरी चिंचवडच्या बातम्या वाचण्यासाठी येथे ► क्लिक करा

मावळात धोका कायम

मावळ तालुक्यात आतापर्यंत आढळलेल्या १७ कोरोना रुग्णांपैकी १३ रुग्णांनी कोरोनावर मात केली आहे. सोमवारी नव्याने रुग्ण आढळल्याने सक्रिय कोरोना रुग्णांची संख्या पाच झाली आहे. आतापर्यंत मावळ तालुक्याच्या शहरी भागात सहा, तर ग्रामीण भागात अकरा, असे १७ कोरोना रुग्ण आढळून आले होते. त्यातील तळेगाव स्टेशन, माळवाडी, अहिरवडे, चांदखेड, घोणशेत, नागाथली, तळेगाव दाभाडे व लोणावळा येथील एक असे, तेरा रुग्ण कोरोनामुक्त झाले असून त्यांना घरी सोडण्यात आले आहे. रुग्णांच्या हाय रिस्क संपर्कातील ७९ व्यक्तींचे अहवालही निगेटिव्ह आले आहेत. गेल्या पाच-सहा दिवसात तालुक्यात दिलासा मिळाला होता. परंतु, सोमवारी पुन्हा रुग्ण आढळल्याने धोका कायम असल्याचे स्पष्ट झाले आहे.
पुण्याच्या बातम्या वाचण्यासाठी येथे ► क्लिक करा