पिंपरी : लॉकडाउनमुळे अनेक दिव्यांग कामगार रोजगाराअभावी घरी बसून असल्याने आर्थिक अडचणीत सापडले आहेत. त्यामुळे राज्य सरकारने आमचे कर माफ करावेत, अशी मागणी शहरातील दिव्यांगांनी केली आहे. 

शहरात सुमारे पाच हजारांहून अधिक दिव्यांग आहेत. बहुसंख्य दिव्यांग इलेक्‍ट्रॉनिक वस्तूंची दुरुस्ती करणारे, मोबाईल दुरुस्ती अशा छोट्या व्यवसायांमध्ये कार्यरत आहेत. लॉकडाउनमुळे यापैकी अनेकांच्या मासिक उत्पन्नावर विपरीत परिणाम झाला आहे. काही जण रोजंदारीवरही काम करतात. मात्र, अनेकांना रोजगारही गमवावा लागला आहे. त्यामुळे जगण्याचीच भ्रांत असल्याने सरकारचे विविध कर भरण्यासाठी पैसे कोठून आणायचे, असा प्रश्‍न त्यांना सतावत आहे. 

पिंपरी-चिंचवडच्या बातम्या वाचण्यासाठी येथे ► क्लिक करा

अनेक दिव्यांग झोपडपट्ट्यांमध्ये राहतात. कोरोनाच्या वाढत्या प्रसारामुळे काम असले, तरी त्यांना मालक लोक कामावर बोलाविण्याचा धोका पत्करत नसल्याचे काही दिव्यांगांनी सांगितले. महापालिकेने घरकुलमधील दिव्यांगांच्या गृहकर्जाचे एक लाख रुपये त्यांच्या बॅंक खात्यांमध्ये जमा करून त्यांना अगोदरच दिलासा दिला आहे.'' यासंदर्भात झुंज दिव्यांग संस्थेचे संस्थापक अध्यक्ष राजू हिरवे यांनी सांगितले, "लॉकडाउनमुळे दिव्यांगांच्या रोजी-रोटिचा प्रश्‍न खूप गंभीर झाला आहे. त्यामुळे वीजबिल, घरपट्टी, एलपीजी गॅसजोडणीचे बिल आदी बिले भरणेही त्यांना शक्‍य नाही. त्यामुळे आम्ही देय असलेले सर्व कर माफ करावेत.''

पुण्याच्या बातम्या वाचण्यासाठी येथे ► क्लिक करा