पिंपरी - भाजपाने (BJP) पाच वर्षात भ्रष्टाचार (Corruption) केल्याचा आरोप करत पिंपरी-चिंचवड शहर (Pimpri CHinchwad City) राष्ट्रवादी काँग्रेसने (NCP) पूर्णानगर येथील उद्यानाच्या उद्घाटनप्रसंगी निदर्शने करत भाजपचा निषेध (Protest) केला. विरोधी पक्षनेते देवेंद्र फडणवीस (Devendra Fadnavis) यांच्या ताफ्यावर चपल्या, बांगड्या, पाण्याच्या बाटल्या आणि काळे झेंडे (Black Flag) फेकले. दरम्यान, आंदोलकांना (Agitation) मागे हटविण्यासाठी पोलिसांना सौम्य लाठीचार्ज करावा लागला. काही जणांना ताब्यात घेतले.

महापालिकेने शहरात उभारलेल्या विविध विकासकामांची उद्घाटने रविवारी (ता. ६ ) फडणवीस यांच्या हस्ते झाली. पूर्णानगर येथील भारतरत्न अटल बिहारी वाजपेयी उद्यानाच्या उद्घाटनप्रसंगी राष्ट्रवादीचे शहराध्यक्ष अजित गव्हाणे यांच्या नेतृत्वाखाली आंदोल झाले. प्रवेशद्वारापासून काही अंतरावर आंदोलनकर्त्यांना अडविण्यात आले होते. तरीही घोषणाबाजी करीत जमाव पुढे सरकत होता. तर प्रवेशद्वारावर उभे असलेले भाजपचे पदाधिकारी, कार्यकर्तेही पुढे सरसावले. दरम्यान, प्रवेशद्वाराकडे येणाऱ्या आंदोलनकर्त्यांना अडविताना पोलिसांनी सौम्य लाठीचार्ज केला. यामध्ये काही कार्यकर्ते जखमी झाले. येथे तणावपूर्ण परिस्थिती निर्माण झाल्याने पोलिस बंदोबस्त वाढविण्यात आला. काही जणांना पोलिसांनी ताब्यातही घेतले.

थोड्या वेळातच फडणवीस यांचा ताफा घटनास्थळी दाखल झाला. यावेळी आंदोलनकर्त्यांनी जोरदार घोषणाबाजी केली. ताफ्यातील वाहनांवर चपल्या, बांगड्या, पाण्याच्या बाटल्या आणि काळे झेंडे फेकले. उद्यानात उद्घाटन सुरू असताना व फडणवीस यांचे भाषण सुरू असताना बाहेर आंदोलनकांची भाजपविरोधी घोषणाबाजी सुरू होती. ‘गली गली मी शोर है, भाजपवाले चोर है’, ‘गोरगरिबो को कष्ट है, भाजपवाले भ्रष्ट है’, ‘चले जाओ, भ्रष्टाचारी भाजप चले जाओ’, ‘फडणवीस गो बॅक’ अशा घोषणा दिल्या. हातात निषेधाचे फलक, काळे झेंडे व डोक्याला काळ्या पट्ट्या बांधून कार्यकर्ते आंदोलनात सहभागी झाले होते.