पिंपरी : पिंपरी-चिंचवड शहर हळूहळू पूर्वपदावर येऊ लागले आहे. शॉपिंग मॉल्स, कॉम्प्लेक्‍स आणि बाजारपेठा वगळता बेकरी, मिठाई, चष्मे, बांधकाम साहित्य आदी सुमारे 750 दुकाने सुरू झाली आहेत. मात्र, इतर प्रकारांतील दुकानांना अद्याप परवानगी देण्यात आलेली नाही. तसेच, प्रतिबंधित क्षेत्रातील दुकाने अजून बंदच ठेवण्यात आली आहेत. 

ताज्या बातम्यांसाठी डाऊनलोड करा ई-सकाळचे ऍप

शहरातील विशिष्ट प्रकारच्या आठ दुकानांना प्रत्यक्ष पाहणीनंतर महापालिकेच्या क्षेत्रीय कार्यालयांकडून दुकाने खुली करण्यास परवानगी दिली जात आहे. त्यासाठी प्रत्येक क्षेत्रीय कार्यालयांना ई-मेलद्वारे मागणी अर्ज प्राप्त होत आहेत. महापालिकेच्या आठ क्षेत्रीय कार्यालयांना आतापर्यंत सुमारे दीड हजारांहून अधिक दुकानदारांनी दुकाने सुरू करण्यासाठी परवानगी अर्ज पाठविले आहेत. मात्र, त्यापैकी केवळ साडेसातशेच्या आसपास दुकाने खुली करण्यास पालिका प्रशासनाने परवानगी दिली आहे. काही अर्ज दुबार आहेत. काही दुकाने शॉपिंग कॉम्प्लेक्‍समध्ये तर काही प्रतिबंधित क्षेत्रात येत आहेत. तसेच काही दुकाने 8 प्रकारच्या दुकानांमध्ये येत नसल्याने त्यांना परवानगी नाकारण्यात आली आहे. 

पिंपरी चिंचवडच्या बातम्या वाचण्यासाठी येथे ► क्लिक करा

'क' क्षेत्रीय कार्यालयाचे क्षेत्रीय अधिकारी अण्णा बोदडे म्हणाले, "आम्हाला 200 दुकानदारांचे ऑनलाइन अर्ज प्राप्त झाले. त्यापैकी 110 दुकाने सुरू करण्यास परवानगी देण्यात आली आहे. मात्र, शॉपिंग मॉल्स, शॉपिंग कॉम्प्लेक्‍स, मोठे मार्केट यांना चालू करण्यास परवानगी देण्यात आलेली नाही. दुसऱ्या टप्प्यात सिमेंट, पत्रे, दरवाजे, खिडक्‍या यासारख्या बांधकाम साहित्य विक्री दुकानांना दुकाने सुरू ठेवण्यास मान्यता देण्यात आली आहे. जेथे सोशल डिस्टन्सिंगचे पालन होऊ शकणार नाही. त्या दुकानांना परवानगी नाकारण्यात आली आहे.'' 

पुण्याच्या बातम्या वाचण्यासाठी येथे ► क्लिक करा 

'ब'क्षेत्रीय अधिकारी प्रशांत जोशी म्हणाले, "माझ्या कार्यालयाला 173 अर्ज प्राप्त झाले असून, त्यातील 152 दुकाने सुरू झाली आहेत. काही दुकाने प्रतिबंधित क्षेत्रात येत आहेत. तर काही अर्ज दुबार आले. स्पा, सलून हे देखील सुरू करण्याबाबत अर्ज आले आहेत. परंतु, त्यांना तूर्तास परवानगी देण्यात आलेली नाही.'' 

'ई' क्षेत्रीय अधिकारी बाळासाहेब खांडेकर म्हणाले, "आमच्याकडे प्रतिबंधित क्षेत्र अधिक आहेत. याशिवाय, काही दुकानदार संघटनांनी 31 मेपर्यंत स्वयंस्फूर्तीने लॉकडाउन पाळण्याचे ठरविले आहे. त्यामुळे 63 अर्जच आले असून, त्यापैकी 47 लोकांना परवानगी देण्यात आली आहे.'' 

क्षेत्रीय कार्यालयानुसार प्राप्त अर्ज आणि मंजूर अर्जाची आकडेवारी : 

- 'अ' ः 370,148 

- 'ब' ः 173, 152 

- 'क' ः200, 110 

- 'ड' ः310, 117 

- ई ः 63, 47 

- 'फ' ः 250, 40 

- 'ह' ः 170, 136 

(ग क्षेत्रीय कार्यालयाची आकडेवारी उपलब्ध होऊ शकली नाही)