पिंपरी - राष्ट्रीय इलेक्ट्रॉनिक्स धोरणा अंतर्गत रांजणगांव येथे इलेक्ट्रॉनिक्स मॅन्युफॅक्चरींग क्लस्टर मंजूरीचा व सुमारे २००० कोटी रुपये गुंतवणूकीचा पुणे जिल्ह्यातील फक्त इलेक्ट्रॉनिक्सच नव्हे तर; औद्योगिक क्षेत्रातील सर्व उद्योजकांना फायदा होणार आहे. त्यामुळे रांजणगांव परिसरासह जिल्ह्याचा चौफेर विकास होणार असल्याची प्रतिक्रिया उद्योजकांनी सोमवारी (ता. ३१) व्यक्त केली.

इलेक्ट्रॉनिक्स मॅन्युफॅक्चरींग क्लस्टरची गुंतवणूक आल्यामुळे रांजणगांव, शिक्रापूर, चाकण, तळेगांव, पिंपरी-चिंचवड या परिसरातील उद्योजकांना याचा फायदा होणार आहे. आयएफबीसारखी रेफ्रीजीरेशनची कंपनी सुमारे ४५० कोटी रुपयांची गुंतवणूक करणार असल्याने इलेक्ट्रॉनिक्ससह प्रेसपार्ट, फॅब्रीकेशन, रबर, प्लॅस्टिक्स अशा औद्योगिक क्षेत्रातील सर्वच उद्योजकांना त्याचा फायदा होणार आहे. या लघु-मध्यम-सूक्ष्म उद्योजकांचा सुटा भाग त्या ठिकाणी पुरवठा केला जाणार आहे. त्या ठिकाणी नवीन तंत्रज्ञान येणार असेल तर; त्याचाही फायदा उद्योजकांना होईल.

- संदिप बेलसरे, अध्यक्ष, पिंपरी-चिंचवड लघु उद्योजक संघटना.

इलेक्ट्रॉनिक्स मॅन्युफॅक्चरींग क्लस्टरची सुमारे २००० कोटींची गुंतवणूक येणार असल्याने इलेक्ट्रॉनिक्ससह अन्य उद्योजकांनाही नवीन तंत्रज्ञान आत्मसात करुन नवीन उद्योग सुरु करण्याची संधी मिळू शकते. या सर्व गुंतवणूकीचा लघु-मध्यम-सूक्ष्म अशा सर्वच उद्योजकांना फायदा होईल. ॲटोमाबाईल क्षेत्रात आता मोठ्या कंपन्या ई-वाहनांकडे गुंतवणूकीसाठी वळल्या आहेत. त्यामुळे या क्लस्टरचा नक्कीच या ई-वाहन उद्योग क्षेत्राला फायदा होईल. वाहन उद्योग वाढला की आपोआप सुट्या भागांचा पुरवठा करणारे छोटे-मोठे उद्योगही वाढीस लागणार.

- अभय भोर, अध्यक्ष, फोरम ऑफ स्मॉल स्केल इंडस्ट्रिज असोसिएशन.