लोणावळा : निसर्ग चक्रीवादळाचा फटका बसलेल्या बोरघाटातील अत्यंत दुर्गम ठिकाणी वसलेल्या नागनाथ येथील आदिवासींच्या ५६ घरांवर छप्पर बसविण्यात आले. येथील शिवसेवा प्रतिष्ठानच्या माध्यमातून हा उपक्रम घेण्यात आला. 

ताज्या बातम्यांसाठी डाऊनलोड करा ई-सकाळचे ऍप     

लोणावळा ते कर्जत दरम्यान रेल्वेमार्गामध्ये नागनाथ केबिन स्थानक येते. दुर्गम ठिकाणी वसलेल्या नागनाथ येथे साधारणपणे साठ घरांची वस्ती आहे. रेल्वेमार्गाचा पर्याय असलेल्या या आदिवासी पाड्यातील ५६ घरांना निसर्ग चक्रीवादळाचा फटका बसल्याने घरांवरील कौले, पत्रे वाऱ्याने उडाल्याने घरांचे प्रचंड नुकसान झाले. लॉकडाउनमुळे रेल्वे सेवा बंद आहे. येथील रानमेव्याला बाजारपेठ मिळाली नाही. त्यामुळे येथील आदिवासींच्या रोजगारावर गदा आल्याने परिस्थिती हलाखीची झाली आहे. त्यात चक्रीवादळामुळे घरांचे प्रचंड नुकसान झाल्याने परिस्थिती सुधरायची कशी? असा प्रश्न या आदिवासी कुटुंबांपुढे निर्माण झाला होता. 

पिंपरी चिंचवडच्या बातम्या वाचण्यासाठी येथे ► क्लिक करा

नुकसानीची माहिती मिळताच याठिकाणी मदतकार्य राबविण्याचे ठरवत शिवसेवा प्रतिष्ठानच्या वतीने संस्थेच्या कार्यकर्त्यांना मदतीचे आवाहन करण्यात आले होते. नुकसान झालेल्या घरांची पाहणी करण्यात आली. संस्थेचे अध्यक्ष धनंजय चंद्रात्रे, माजी नगरसेवक दत्तात्रेय येवले, लोणावळा रेल्वे स्थानकाचे सहाय्यक व्यवस्थापक गजेंद्र यादव, राजेश येवले, आशिष मेहता, अजित घमंडे, सुनील व्हरांबळे, राजेश कामठे आदी पदाधिकाऱ्यांनी पुढाकार घेतला.  छप्पर उडालेल्या ५६ घरांवर लोखंडी पत्रे टाकण्यात आले असून नागनाथ येथील ग्रामस्तांनी संस्थेचे आभार व्यक्त केले.

पुण्याच्या बातम्या वाचण्यासाठी येथे ► क्लिक करा