भोसरी : दारूची दुकाने सुरू होणार, या बातम्या प्रसिद्ध झाल्यावर भोसरीतील इंद्रायणीगरातील एका दारूच्या दुकानाबाहेर तळीरामांनी गर्दी केली होती. एरवी रेशन, किराणा दुकान, भाजी मंडई येथे खरेदी करण्यासाठी नागरिक संचारबंदीचे उल्लंघन करतात. मात्र, दारूच्या दुकानाबाहेर सोशल डिस्टंन्सिंग पाळत नागरिकांनी सुमारे एक किलोमीटर लांबपर्यंत रांग लावली होती. या बाबत नागरिकांमधून आश्चर्य व्यक्त होत आहे. पोलिसांना गर्दी केल्याची माहिती कळताच पोलिसांनी सर्वांना हुसकावून लावले.

ताज्या बातम्यांसाठी डाऊनलोड करा ई-सकाळचे ऍप

कोरोना व्हायरसचा संसर्ग टाळण्यासाठी देशासह राज्यात संचारबंदी लागू झाली. त्यामुळे सर्वच दुकाने बंद ठेवावी लागली. दारूची दुकानेही बंद ठेवण्यात आल्याने तळीरामांची पंचाईत झाली. दारूची दुकाने उघडली जाणार असल्याच्या बातम्या प्रसिद्ध झाल्यानंतर तळीरामांनी भोसरीतील इंद्रायणीनगरातील एका दारूच्या दुकानाबाहेर प्रचंड गर्दी केली. सकाळपासूनच दुकानाबाहेर अगदी सोशल डिस्टन्सिंगचे पालन करत तळीराम थांबले होते. मात्र, तळीरामांद्वारे सोशल डिस्टन्सिंगचे काटेकोर पालन करण्यात आल्याने नागरिकांमधून आश्चर्य व्यक्त होत आहे.

दारू खरेदी करण्यासाठी मोठमोठ्या पिशव्या घेऊन तळीराम बाहेर थांबले होते. विशेष म्हणजे रणरणत्या उन्हातही ते आपली रांग न मोडता तळपत थांबले होते. याची माहिती पोलिसांनी मिळाली. पोलिसांनी तातडीने घटनास्थळी दाखल होत तळीरामांना हुसकावून लावले. 

पिंपरी चिंचवडच्या बातम्या वाचण्यासाठी येथे ► क्लिक करा

परिसरातील दारूची दुकाने सुरू करण्याचा सरकारचा आदेश  अद्याप आमच्यापर्यंत आलेला नसल्याने दारूची दुकाने बंदच राहणार असल्याची माहिती भोसरी एमआयडीसी पोलिस ठाण्याचे वरिष्ठ पोलिस निरीक्षक राजेंद्र कुंटे यांनी दिली.