जुनी सांगवी : पिंपरी-चिंचवड शहरातील कोरोना संसर्गाची साखळी खंडीत करण्यासाठी प्रशासनाच्या वतीने दर रविवारी व गुरुवारी पुकारलेल्या जनता कर्फ्यूला जुनी सांगवी व दापोडीकरांनी कडकडीत बंद पाळला. अत्यावश्यक सेवा वगळता संपूर्ण बाजारपेठ व्यापाऱ्यांनी बंद ठेवल्या होत्या. मात्र, शुक्रवारी (ता. १०) येथील रस्ते गर्दीने फुलले होते. यामुळे सोशल डिस्टन्सिंगचा पुरता बट्ट्याबोळ झाला होता. त्यातच पुणे जिल्ह्यात कडक लॉकडाउन होणार असल्याच्या बातम्यांमुळे नागरिकांनी घर सामान खरेदीसाठी बाजारपेठेत प्रचंड गर्दी केली होती.

महत्त्वाची बातमी : पिंपरी-चिंचवड शहरासाठी असा असेल लॉकडाउन

एकीकडे चौकांमधून विनामास्क फिरणाऱ्यांवर कारवाईसाठी पथके कार्यान्वित होती. मात्र, याकडे काणाडोळा करत रस्त्यावंर भाजी खरेदी, विविध वस्तू खरेदीसाठी दुकानांमधून नागरिकांनी गर्दी केली होती. जुनी सांगवी भागात दोन दिवसांपूर्वी विनामास्क बाहेर फिरणाऱ्या जवळपास पन्नास जणांवर आरोग्य विभाग व पोलिस पथक यांनी संयुक्तपणे दंडात्मक कारवाई केली होती. ती शुक्रवारी पुन्हा सुरू होती. मात्र, गुरुवारी आम्ही बंद पाळला शुक्रवारी आम्ही घराबाहेर आलेच पाहिजे, अशा अविर्भावात सांगवीकरांनी रस्त्यावर गर्दी केली होती. 

भाजी खरेदीसाठी झुंबड

शितोळेनगर ते एकता चौक या प्रमुख रस्त्यावर दुतर्फा विक्रीसाठी उभ्या असलेल्या भाजी विक्रेत्यांकडून भाजी खरेदीसाठी नागरिकांची झुंबड उडाली होती. या परिसरात विक्रेत्यांवर अनेकदा पालिका प्रशासनाकडून कारवाईही झाली. मात्र, हातगाड्या जप्त करूनही विक्रेत्यांनी पदपथावरच भाजी विक्रीची दुकाने थाटली आहेत. यातच नेहमीचे विक्रेत्यांपेक्षा बाहेरच्या विक्रेत्यांनी येथे ठाण मांडल्याने भाजी विक्रेत्यांची संख्या तिप्पट झाल्याचे एका विक्रेत्याने सांगितले.