पिंपरी : चऱ्होली गावच्या हद्दीतील इंद्रायणी नदीपत्रातून अवैधरित्या वाळू उपसा करणाऱ्या १३ जणांना पिंपरी चिंचवड गुन्हे शाखेने अटक केली आहे. तर दोन मुख्य सूत्रधार फरारी आहेत. या वाळूमाफियांकडून सुमारे एक कोटी ३१ लाख २८ हजार रुपयांचा ऐवज जप्त केल्याची माहिती पोलिस आयुक्त कृष्ण प्रकाश यांनी दिली.

केतन रामदास कोलते (वय २७, रा. बेकोरी), योगेश सुरेश वाळुंज (वय २९, रा. लोणीकंद), संदेश नंदकुमार कारले (वय २५, रा. देवाची आळंदी), दीपक भाऊसो येळे (वय २८, मु पो पारोडी, ता. शिरूर),  अजहर मजहर शेख (वय २९, रा. लातूर), अंकुश अजयराम कुमार (वय १९, रा. बिहार),  अतुल बाबाजी येळे (वय २५, रा. मु पो पारोडी, ता. शिरूर), अर्जुन जीवन चव्हाण, (वय १९, रा. करोळ, ता. पुसद, जि. यवतमाळ), सोमल मौलानी पठाण (२४, ता. औसा, जि. लातूर),  सुधीर बाळू राठोड (वय २५, रा.रा. करोळ, ता. पुसद, जि. यवतमाळ), विलास सुद्राम येळे (वय ३०, रा.  मु पो पारोडी, ता. शिरूर), सारीक आरिफ पठाण (वय ३५, रा. श्रीकृष्णनगर, जि. लातूर), रवीकुमार श्रीराम धारीराम (वय २१, रा. झारखंड) अशी अटक केलेल्यांची नावे आहेत. केतन कोलते , सतीश लांडगे व अजय हे मुख्य सूत्रधार असून सतीश आणि अजय फरारी आहेत.

चऱ्होली येथे इंद्रायणी नदीपात्रातून वाळू उपसा केला जात असल्याची माहिती मिळाली होती. त्यानुसार गुन्हे शाखेच्या पथकाने सापळा रचला. शुक्रवारी (ता. १९) मध्यरात्री चऱ्होली गावच्या हद्दीत नदी पात्रातून वाळू उपसा करताना वाहने आढळून आली. यामध्ये दोन पोकलेन, चार ट्रॅक्तर, ट्रॉली, १४ ब्रास वाळू, १ दुचाकी असा मुद्देमाल जप्त करण्यात आला.  दिघी पोलिस अधिक तपास करीत आहेत.