पिंपरी : राजवाडेनगर, काळेवाडी येथे शनिवारी सायंकाळी क्रिकेटवर सट्टा घेणारे चौघेजण रंगेहाथ सापडले. त्यांच्याकडून आठ मोबाइलसह 27 लाखांचा मुद्देमाल हस्तगत केला आहे. सनी उर्फ भूपेंद्र चरणजीतसिंग गिल (वय 38, रा. काळेवाडी) रिक्की राजेश खेमचंदानी (वय 36, डीलक्स थिएटरमागे, पिंपरी), सुभाष रामकिसन अगरवाल (वय 57, रेल्वे स्टेशनजवळ, पिंपरी) आणि सनी सुखेजा (रा. पिंपरी) अशी आरोपींची नावे आहेत.

सहाय्यक पोलीस उपनिरीक्षक हजरत अली पठाण यांनी वाकड पोलिस ठाण्यात फिर्याद दिली आहे. कारवाई करत असताना, "अंगाला हात लावायचा नाही. माझी ओळख लांबपर्यंत आहे. माझ्यावर काही कारवाई झाल्यास चांगले होणार नाही" अशी धमकी देत आरोपी गिल याने पोलिसांशी झटापट केली, असेही फिर्यादीत म्हटले आहे.