पिंपरी : पोलिसांची परवानगी न मिळाल्याने छत्तीसगड येथील मूळगावी जाण्यासाठी देहूरोड येथील साईनगरमधून आलेल्या बांधकाम मजूर कुटुंबांना तब्बल 10 तासांपेक्षा अधिक काळ एसटीने जाण्यासाठी वाट पहावी लागली. मात्र, अखेरपर्यंत परवानगी मिळाली नसल्याने परत देहूरोडला जाण्याचा निर्णय त्यांना नाइलाजास्तव घ्यावा लागला. 

ताज्या बातम्यांसाठी डाऊनलोड करा ई-सकाळचे ऍप

मागील चार दिवसांपासून राज्य मार्ग परिवहन महामंडळातर्फे (एसटी) छत्तीसगड, मध्य प्रदेश, कर्नाटक आदी राज्यांतील मजूरांना त्यांच्या मूळगावी पाठविले जात आहे. हे ऐकून देहूरोड येथील 11 जणांचे बांधकाम मजूरांचे कुटुंब सकाळी 6 वाजता वल्लभनगर एसटी स्थानकावर येऊन थांबले. मात्र, त्यांचा पोलिसांच्या यादीत समावेश नसल्याने त्यांना त्यांच्या मूळगावी जाता आले नाही. 

पिंपरी चिंचवडच्या बातम्या वाचण्यासाठी येथे ► क्लिक करा

संतोष कुमार साहू म्हणाले, "आम्ही सर्वजण बांधकाम मजूर असून गवंडी, बिगारी काम करतो. आमच्या सर्वांची वैद्यकीय तपासणी झाली असून, देहूरोड पोलिस ठाण्यातही आमचे नाव नोंदविले आहे. वल्लभनगर येथून गावाला जाण्यासाठी गाड्या सोडत असल्याचे कळाले. त्यामुळे आम्ही वल्लभनगर येथे आलो. मात्र, पोलिस परवानगी मिळाली नसल्याचे कारण देत आम्हाला बसप्रवास करू दिला गेला नाही. आमच्यापैकी एकजण देहूरोड पोलिस ठाण्यात जाऊन चौकशी केली. परंतु, पोलिसांकडून त्याला प्रतिसाद मिळाला नाही.'' धनीराम लोधी म्हणाले, "आम्हाला गावी जायचे आहे. परंतु, आमचा ठेकेदार सोडत नाही. तुम्ही गावी कसे जाता? हे पहातो, असे तो म्हणाला आहे. मात्र, आम्ही गावी जाणारच आहोत. बसने नाहीतर ट्रकने जाऊ. अन्यथा पायी देखील जाऊ. पण, गावी जाऊच.'' 

पुण्याच्या बातम्या वाचण्यासाठी येथे ► क्लिक करा 

देहूरोड पोलिस ठाण्याचे निरीक्षक मनिष कल्याणकर म्हणाले, "आमच्याकडील यादीत या कुटुंबांचे नाव नाही. त्यामुळे आमच्याकडून त्यांना गावी जाण्यासाठी परवानगी देण्यात आलेली नाही. सहाय्यक पोलिस आयुक्तांकडे पाठविलेल्या अर्जांत त्यांचे नाव आहे, की नाही हे तपासावे लागेल.'' 

15 गाड्यांमधून 509 प्रवासी रवाना 

वल्लभनगर आगारामधून दुपारी 1 वाजता गाड्या सोडण्यास सुरुवात झाली. सायंकाळपर्यंत छत्तीसगड, मध्यप्रदेशातील 509 मजूरांना गोंदिया, धुळे आणि जळगाव जिल्ह्याच्या सीमेवर सोडण्यात आले.