पिंपरी : लॉकडाउनच्या कालावधीत आयटी कंपन्यांनी कर्मचाऱ्यांना वर्क फ्रॉम होम करण्याची सुविधा दिली असली, तरी या कंपन्यांमध्ये काम करणाऱ्या 39 हजार कर्मचाऱ्यांनी त्यांना भेडसावणाऱ्या विविध प्रकारच्या तक्रारी राष्ट्रीय माहिती तंत्रज्ञान कर्मचारी सिनेटच्या माध्यमातून कामगार आयुक्‍तांकडे केल्या असल्याचे या संघटनेचे सरचिटणीस हरप्रीत सलुजा यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप

लॉकडाउन सुरू झाल्यानंतर एक महिन्यांच्या कालावधीत या तक्रारी आल्या असून, त्याबाबत लवकर कारवाई करण्यासंदर्भात संघटनेचा कामगार आयुक्‍त कार्यालयाकडे पाठपुरवठा सुरू आहे. 

या आहेत तक्रारी..... 
आयटी कर्मचाऱ्यांनी संघटनेकडे केलेल्या तक्रारींमध्ये काही कंपन्यांनी कर्मचाऱ्यांचा पगार कमी केल्याच्या तक्रारी आहेत. आपल्याकडे काम नसल्याचे कारण पुढे करत काहीजण कामावरुन कमी करण्याच्या तयारीत आहेत. सध्या कंपनीकडे काम नसल्यामुळे पुढल्या महिन्यात पगार देता येणार नाही, अशी सूचना काहीजणांनी आपल्या कर्मचाऱ्यांना केल्या आहेत, त्यामुळे आयटी कर्मचाऱ्याचा रोजचा दिवस तणावात जात आहे.

लॉकडाउनमुळे निर्माण झालेली परिस्थिती सुधारण्यास काही काळ लागणार आहे. मात्र, त्याचा परिणाम नोकरीवर व्हायला नको, अशी या कर्मचाऱ्यांची भूमिका असल्यामुळे त्यांनी पुढे येउन तक्रारी नोंदवल्या असल्याचे सलूजा यांनी स्पष्ट केले. दरम्यान, आयटी कंपन्यांमध्ये काम करणारे काहीजण हे बाहेरच्या राज्यातले आहेत.

पुण्याच्या बातम्या वाचण्यासाठी येथे ► क्लिक करा 

अनेकांची कंपनी पुण्यात असल्यामुळे काहीजणांनी कर्ज काढून घराची खरेदी केली आहे. पुढल्या महिन्यात पगार झाला नाही, तर घर चालवायचे कसे असा प्रश्‍न अनेकांना सतावतो आहे. त्यामुळे तक्रार करणाऱ्या कर्मचाऱ्यांचा आकडा 39 हजारापर्यंत गेला आहे. दरम्यान, लॉकडाउनचा कालावधी वाढला तर त्यामधे वाढ होण्याची शक्‍यता वर्तवण्यात येत आहे.