पिंपरी : पिंपरी-चिंचवडमधील विराज जगताप खूनप्रकरणी मराठा-दलित वाद निर्माण करू पाहणाऱ्या आणि मुलींबाबत आक्षेपार्ह टिप्पणी करणाऱ्या समाजकंटकांची चौकशी करावी. तसेच त्यांच्यावर कडक कारवाई करावी, अशी मागणी मराठा क्रांती मोर्चा व सकल मराठा समाजाने (पिंपरी-चिंचवड शहर जिल्हा) केली आहे. मराठा क्रांती मोर्चाचे समन्वयक प्रतीक इंगळे, सागर तापकीर, नीलेश शिंदे, अभिषेक म्हसे यांनी त्याबाबत राज्याचे मुख्यमंत्री, गृहमंत्री आणि पिंपरी-चिंचवड पोलीस आयुक्त यांना निवेदन देण्यात आले. 

ताज्या बातम्यांसाठी डाऊनलोड करा ई-सकाळचे ऍप    

या निवेदनात म्हटले आहे, की विराज जगताप खून प्रकरणात दोषी आरोपींना शासन व्हावे. मराठा समाजातील कोणीही यासाठी कसल्याही प्रकारचा विरोध केलेला नाही. या प्रकरणी योग्य ती कायदेशीर प्रक्रिया चालू असताना काही समाजकंटक या घटनेच्या आधारे मराठा-दलित समाजात जाणीवपूर्वक तेढ निर्माण करण्याचा प्रयत्न करत आहेत. या प्रकरणाला जातीय रंग देऊन अत्यंत भडक प्रकारच्या धमक्‍या आणि चिथावणीखोर पोस्टर्स विशिष्ट समाजाकडून व्हायरल केली जात आहेत. याशिवाय टिकटॉक, फेसबुक, इन्स्टाग्राम, व्हॉटस्‌अप यावर तरुणींबाबत अतिशय खालच्या थराला जाऊन टीका-टिप्पणी करण्याचे प्रकार सर्रास सुरु आहेत. 

पिंपरी चिंचवडच्या बातम्या वाचण्यासाठी येथे ► क्लिक करा

काही मोजक्‍या विशिष्ट समाजातील अशा विकृत प्रवृत्तींमुळे राज्यातील सामाजिक ऐक्‍य धोक्‍यात आलेले आहे. त्यातून राज्यात तणाव निर्माण करण्याचा प्रयत्न सुरु आहे. समाजातील अशा जातीयवाद पसरविणाऱ्या आणि समाजातील महिलांबद्दल आक्षेपार्ह टिप्पणी करणाऱ्या व्यक्तींविरुद्ध कडक कारवाई करण्यात यावी. याशिवाय सोशल मीडियावर मराठा समाजाची भूमिका मांडणाऱ्या तरुणांना ऍट्रॉसिटीचे गुन्हे दाखल करण्याच्या धमक्‍या दिल्या जात आहेत. हा कायद्याचा सरळ गैरवापर करुन मराठा समाजाची बदनामी केली जात आहे. याबाबत राज्यातील सामाजिक आणि कायदेशीर व्यवस्था अबाधित ठेवण्यासाठी अशा प्रकारांना आळा बसावा यादृष्टीने, कडक शासन होणे आवश्‍यक आहे.

पुण्याच्या बातम्या वाचण्यासाठी येथे ► क्लिक करा