पिंपरी : "ना काहींच्या तोंडाला मास्क ना रुमाल...डोक्यावर तळपते ऊन...ना कसली पर्वा फक्त दारू मिळाली पाहिजे. त्यासाठी सकाळपासूनच रांगेत तासनतास..." असेच चित्र बुधवारी (ता. 6) सलग तिसऱ्या दिवशी शहरातील विविध भागात पहायला मिळाले. अक्षरशः काहींनी पोती भरून दारूच्या बाटल्या खरेदी केल्या, तरी काहींनी "कोरोनामुळे मरण्यापेक्षा मद्य पिऊन जगू द्या," अशा बेधडक भावनादेखील व्यक्त केल्या. 

ताज्या बातम्यांसाठी डाऊनलोड करा ई-सकाळचे ऍप      

सोमवार (ता. ४) पासून सरकारने दारू विक्रीला परवानगी दिल्याने मद्यप्रेमींची झुंबड उडाली आहे. सोशल डिस्टंन्सिंगच्या नियमांना पायदळी तुडविण्यात आले. दुकानदार व पोलिसांकडूनही खबरदारीच्या उपाययोजना केल्या नसल्याने ही गर्दी अनावर होत आहे. अशीच गर्दी बुधवारी मासुळकर कॉलनी येथील वाईन शॉपीबाहेर पहायला मिळाली. या दुकानाबाहेर सकाळी १० वाजता दुकाने उघडण्यापूर्वीच अर्ध्या किलोमीटरपेक्षा जास्त लांब रांगा लागल्या होत्या. दुकान बंद होईल, या भीतीपोटी काही मद्यप्रेमींनी पोती भरून, तर काही जणांनी अख्खा बॉक्स खरेदी केला. 

पिंपरी चिंचवडच्या बातम्या वाचण्यासाठी येथे ► क्लिक करा

काही मद्यपी एक फुटापेक्षा जास्त अंतर ठेऊन उभे होते, तर काहीनी गर्दी केली होती. रांगेत 60 वर्षीय व्यक्तीपासून ते तरुणांनी गर्दी केली होती. या गर्दीची गंभीर दखल घेऊन दुकानदार माईकद्वारे  सोशल डिस्टन्सिंग पाळण्याच्या सूचना करत होते. असेच चित्र चिखली,  काळेवाडी, संत तुकाराम नगर,  थेरगाव,  चिंचवड, निगडी,  भोसरी या भागातही पाहायला मिळाले. काही मद्य ग्राहकांनी "आम्हाला दारू पिऊ द्या, कोरोनामुळे मरण्यापेक्षा पिऊन जगू द्या," अशा बेधडक प्रतिक्रियाही व्यक्त केल्या.