पिंपरी : कोरोना विषाणूंचा प्रार्दुभाव वाढत असल्यामुळे दीड महिन्यापासून बंद असणाऱ्या हिंजवडी आयटी पार्कमधील कंपन्यांना काम करण्याची परवानगी देण्यात आली असली, तरी त्याठिकाणी कमीत कमी मनुष्यबळात सर्व्हर, युपीएची देखभाल हीच मुख्य कामे करण्यात येणार असल्याचे उद्योग विभागाचे सहसंचालक सदाशिव सुरवसे यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप

आयटी कंपन्यांनी कर्मचाऱ्यांना वर्क फ्रॉम होमची सुविधा दिली आहे. त्यामुळे सर्वजण सध्या घरातून काम करीत आहेत. यासाठी आवश्‍यक असणाऱ्या बॅकअपची देखभाल नियमितपणे व्हावी, तसेच काम व्यवस्थितपणे सुरू राहावे, यासाठी आयटी कंपन्यांना ही परवानगी देण्यात आली आहे. दरम्यान, आयटी कंपन्यांमधे काम करणाऱ्या कर्मचाऱ्यांना संबधित पोलिस ठाण्याकडून पास देण्यात आले आहेत. त्याआधारे त्यांना कंपनीमध्ये ये-जा करता येणार आहे. बॅंकिंग, मेडिकल, हेल्थकेअर, टेलिकॉम अशा अनेक क्षेत्रात काम करणाऱ्या कंपन्यांचे काम या आयटी कंपन्या करीत आहेत. 

पिंपरी चिंचवडच्या बातम्या वाचण्यासाठी येथे ► क्लिक करा

लॉकडाउनच्या कालावधीत हे काम सुरळीतपणे सुरू राहावे, म्हणून आयटी कंपन्यांना कमी मनुष्यबळात काम करण्याची मुभा देण्यात आल्याचे सुरवसे यांनी नमूद केले. दरम्यान, आयटी कंपन्यांमध्ये ये-जा करणाऱ्या कर्मचाऱ्यांच्या सुरक्षेचा विचार करून प्रशासनाने त्याठिकाणी उपाययोजना करण्याच्या सूचनादेखील दिल्या आहेत. कंपनीमध्ये येणाऱ्या कर्मचाऱ्यांचे तापमान तपासणे, कामाचे ठिकाण स्वच्छ ठेवणे, सॅनिटायझरचा वापर करणे, कंपनीचा परिसर स्वच्छ ठेवणे या सूचना कंपन्यांना दिल्या आहेत. 

या कर्मचाऱ्यांना 'नो एन्ट्री' 

कोरोनोचा संसर्ग असणाऱ्या कंटेन्मेंट एरियामध्ये राहाणाऱ्या कर्मचाऱ्यांना कंपनीत काम करण्याची परवानगी नाही. त्यामुळे आपल्याकडे कामासाठी येणारा कर्मचारी कोणत्या भागातून येत आहे, तो परिसर कंटेन्मेंट एरियामध्ये नाही ना, याची तपासणी कंपनी प्रशासनाने करणे आवश्‍यक आहे.