पिंपरी - 35 लाखांच्यावर लोकसंख्या असलेल्या पिंपरी चिंचवड शहरातील नागरिकांच्या दैनंदिनितून निर्माण होणारा कचरा (Garbage) मोशी (Moshi) येथील कचरा डेपोमध्ये संकलित केला जातो. लाखो टन कचरा एकत्रीत जमा केल्यामुळे त्यास डोंगराचे स्वरूप प्राप्त झालेले असून यास बुधवारी (ता.6)सायंकाळी पाचच्या दरम्यान भीषण आग (Fire) लागली आहे.

आगीने रौद्र रूप धारण केलेले असून असंख्य धुराचे लोट आकाशामध्ये झेपावत आहेत. यामुळे हवेच्या प्रदूषणात मोठी वाढ होत असल्याने पिंपरी-चिंचवडकरांचा आरोग्याचा प्रश्न गंभीर बनलेला आहे. पालिका प्रशासनाची उदासीनतेच्या भूमिकेमुळेच कचरा डेपोला सातत्याने आग लागण्याचा प्रकार वारंवार घडत आहेत. आग लागण्याचे कारण नैसर्गिक आहे की हेतुपुरस्सर आग लावण्याचा मानव निर्मित प्रयत्न होत आहे ?असा प्रश्न नागरिकांच्या मनात निर्माण होत आहे.

कारण अशा वारंवार घडणाऱ्या कचरा डेपोतील घटनांमुळे शहारातील एकत्रीत होणारा कचरा नष्ट करण्याच्या शास्त्रोक्त पद्धतीचा वापर करण्याऐवजी आगींच्या घटनांमुळे हा कचरा आपोआपच नष्ट होत असल्याने 'सुंठीवाचून खोकला गेला' अशी तर पालिका प्रशासनाची भूमिका नाही ना ? या शंकेला पुष्टी मिळत आहे .

कचरा डेपोतील वारंवार होणारे आगीचे प्रकार हे कशाचे द्योतक आहे ? महापालिकेने शहरातील नागरिकांच्या आरोग्याचा खेळ मांडलेला असून झालेल्या प्रकाराला जबाबदार असणाऱ्यांची जबाबदारी निश्चित करून संबंधितांवर कठोर कारवाई करावी अन्यथा या विरोधात शहरात जन आंदोलन उभे करण्यात येईल याची पालिका प्रशासनाने गांभीर्याने नोंद घ्यावी, अशी मागणी उदयसिंह पाटील यांनी केली आहे.