पिंपरी : चिंचवड स्टेशन येथे कोरोना संकटग्रस्त आनंदनगर झोपडपट्टीमध्ये कष्टकरी लोक उपाशी राहू नयेत, यासाठी माणुसकीच्या नात्याला जागत अग्रसेन महाराज अन्नपूर्णा रसोईतर्फे दररोज सुमारे 2 हजार 700 लोकांना सकाळ-संध्याकाळ जेवण पुरविण्यात येत आहे. यापुढे तेथील लोकांना 'पॅक फूड' देण्याचा संस्थेचा विचार आहे. 

ताज्या बातम्यांसाठी डाऊनलोड करा ई-सकाळचे ऍप

टाळेबंदी लागू झाल्यापासून चिंचवड स्टेशन येथील अग्रसेन अन्नपूर्णा रसोईतर्फे शहराच्या विविध भागांतील गरजू, गोरगरीब लोकांना दररोज जेवण पुरविले जात आहेत. त्यामध्ये आनंदनगर झोपडपट्टीचाही समावेश आहे. महापालिकेकडून या संस्थेला सुमारे दोन आठवडे गहू, तांदूळ आदी धान्य पुरविण्यात आले. मात्र, आता अग्रसेन अन्नपूर्णा रसोईकडून स्वखर्चाने गरजू लोकांना अन्न दिले जात आहे. 

पिंपरी चिंचवडच्या बातम्या वाचण्यासाठी येथे ► क्लिक करा

संस्थेचे अध्यक्ष सुनील आगरवाल म्हणाले, "आम्ही शहरातील गरजू लोकांना टाळेबंदीच्या पहिल्या दिवसापासून जेवण देत आहोत. आनंदनगरमध्ये आम्ही तयार जेवण देत होतो. परंतु, तेथील करोनाग्रस्तांची वाढती संख्या लक्षात घेऊन आम्ही फूड पॅकेट देण्याचा विचार करत आहोत. त्यामुळे अन्नदान करणारे कार्यकर्ते आणि गरजू माणसाचा एकमेकांशी संपर्क कमी होईल. सध्या महापालिकेचे काही कर्मचारी, स्थानिक नगरसेवकांचे कार्यकर्ते आणि आमच्या संस्थेचे कार्यकर्ते आनंदनगरमधील लोकांमध्ये जेवण देत आहेत. पालिकेकडून पूर्वी आम्हाला धान्य दिले जात असे. परंतु, मागील आठवडाभरापासून हे धान्य देणे बंद झाले आहे. त्यामुळे आम्ही आमच्यापरीने लोकांना जेवण देत आहोत. 31 मेनंतही अन्नवाटप चालू ठेवण्याचा आमचा विचार आहे. आनंदनगरखेरीज, विकासनगर, रुपीनगर भागांतील प्रतिबंधित क्षेत्रातही जेवण देण्याचे आमचे प्रयत्न राहतील.'' 

पुण्याच्या बातम्या वाचण्यासाठी येथे ► क्लिक करा 

पिंपरी-चिंचवड बरोबरच पुण्यातही संस्थेनेकडून योगदान दिले जात आहे. या सामाजिक कार्यात संस्थेचे रमेश गोयल, विनोद मित्तल, मुकेश मित्तल, सुशील मित्तल, संदीप गुप्ता, ओंकार पारेख, नवीन बन्सल, आशिष गर्ग, सुजीत आगरवाल आदी पदाधिकारी आणि कार्यकर्त्यांचे सहकार्य लाभत आहे.