पिंपरी : प्रेमप्रकरण आणि जुन्या भांडणाच्या कारणावरून युवकाचे अपहरण केले. त्यानंतर त्याचा दगडाने ठेचून खून केला. एवढेच नव्हे तर, हत्येनंतर मृतदेह दुचाकीवरून नेत शेल पिंपळगाव येथील नदीपात्रात टाकल्याचा धक्कादायक प्रकार समोर आला आहे. या घटनेनंतर परिसरात खळबळ उडाली आहे. मोशी येथे ही धक्कादायक घटना समोर आली आहे. याप्रकरणी अविनाश विसे (रा. शिवाजीवाडी, मोशी) याला अटक करण्यात आली असून, इतर नऊ अल्पवयीन मुलांवर गुन्हा दाखल करण्यात आला आहे.

कृष्णा रेळेकर (वय १८, रा. शिवाजीवाडी, मोशी) असे खून झालेल्या युवकाचे नाव आहे. याप्रकरणी अविनाश विसे (रा. शिवाजीवाडी, मोशी) याला अटक केली असून इतर नऊ अल्पवयीन मुलांवर गुन्हा दाखल आहे. अल्पवयीन मुलांचे एका अल्पवयीन मुलीशी प्रेमप्रकरण आहे. या प्रेमप्रकरणातून तसेच जुन्या भांडणावरून आरोपींनी मंगळवारी (ता. १२) रात्री साडे नऊच्या सुमारास कृष्णा याचे अपहरण केले. त्यानंतर दगडाने त्याला मारहाण केली यामध्ये तो गंभीर जखमी झाला. यानंतर आरोपींनी त्याला दुचाकीवरून चाकणजवळील शेलपिंपळगाव येथे नेले. दरम्यान, त्याचा मृत्यू झाला. त्यानंतर आरोपींनी मुलाचा मृतदेह नदीपात्रात फेकला. अल्पवयीन आरोपीने गुरुवारी पोलिसांकडे या गुन्ह्याची कबुली दिल्यानंतर ही घटना उघडकीस आली आहे. या सर्व घटनेनंतर पोलिसांनी मृतदेह ताब्यात घेतला असून फरारी आरोपींचा शोध सुरू आहे. या प्रकरणाचा अधिक तपास पोलीस करत आहेत.