पिंपरी - कोविड योद्धाना न्याय मिळावा. मानधन तत्त्वावर कायम ठेवावे, या मागणीसाठी कोविड योद्धा बचाव कृती समितीने महापालिका प्रवेशद्वारासमोर आज (ता.२८) आंदोलन केले. या आंदोलनात ‘‘ठेकेदारी हटवा, महापालिका वाचव’, ‘नही चलेगी नही चलेगी, ठेकेदारी नही चलेगी’, ‘ठेकेदारीचा भ्रष्टाचार थांबलाच पाहिजे’, ‘ठेकेदारी हटाव, कोरोना योद्धे बचाव’’ असे फलक हातामध्ये घेत महापालिकेतील मानधनावरील कर्मचाऱ्यांनी रुग्णालयातील कर्मचाऱ्यांच्या खासगीकरणाविरोधात मोठ्यासंख्येने सहभाग घेतला.

महापालिकेच्या विविध रुग्णालयांत खासगी एजन्सीमार्फत मनुष्यबळ पुरविण्यास सत्ताधारी भाजपने मंजुरी दिली आहे. महापालिकेच्या वायसीएम रूग्णालयासह इतर नऊ रुग्णालयांमध्ये वैद्यकीय अधिकाऱ्यांपासून स्टाफनर्स, पॅरामेडिकल स्टाफसह इतर कर्मचाऱ्यांची आऊटसोसिंगद्वारे नेमणूक केली जाणार आहे. या रुग्णालयांमध्ये मनुष्यबळ पुरविण्यासाठी तीन ठेकेदारांची दोन वर्षासाठी नियुक्ती करण्यात आली आहे. या खासगीकरणाला मानधनावरील कर्मचाऱ्यांचा तीव्र विरोध आहे. ‘कोविड योद्धाना न्याय मिळावा, मानधन तत्त्वावर कायम ठेवावे’, ‘समान काम समान वेतन द्यावे, आम्हाला ठेकेदारीमध्ये टाकू नका,’ ११ महिने करार पद्धतीने कामावर ठेवा, कायम कर्मचाऱ्यांप्रमाणे सर्व सुविधा मिळाव्यात, अशा मागण्या मानधनावरील कर्मचाऱ्यांनी केल्या.