पिंपरी : भांडणाच्या रागातून आई-वडील व भावाने मिळून पोटच्या मुलाचा गळा आवळून खून केला. पुरावा नष्ट करण्यासाठी मृताच्या हातात दोरी देऊन आत्महत्येचा बनाव रचला. ही घटना रहाटणी येथे उघडकीस आली. 

ताज्या बातम्यांसाठी डाऊनलोड करा ई-सकाळचे ऍप

विजय रामदास वखरे (वय 28, रा. भालेराव कॉलनी, रहाटणी) असे खून झालेल्या तरुणाचे नाव आहे. या प्रकरणी मृताचा भाऊ गणेश रामदास वखरे (वय 30), वडील रामदास श्रीधर वखरे (वय 50) आणि आई चंचल रामदास वखरे (वय 46, सर्व रा. भालेराव कॉलनी, रामनगर, रहाटणी) यांच्यावर गुन्हा दाखल झाला आहे. मृत विजय यांचे शुक्रवारी (ता. 8) पत्नीसोबत भांडण झाले. या भांडणात त्याचा भाऊ गणेश आणि वडील रामदास यांनी मध्यस्थी केली. 

पिंपरी चिंचवडच्या बातम्या वाचण्यासाठी येथे ► क्लिक करा

या रागातून विजयने वडीलांच्या हाताला चावा घेतला, तर भावावर चाकूने वार केला. या बाबत गणेश याने विजयच्या विरोधात पोलिसात तक्रार दिली. दरम्यान, शनिवारी (ता. 9) दुपारी गणेश व विजय यांच्यात पुन्हा भांडण झाले. यावेळी तिनही आरोपींनी विजयचे हातपाय बांधून दोरीने गळा आवळून विजयचा खून केला. त्यानंतर खुनाचा पुरावा नष्ट करण्यासाठी आरोपींनी विजयच्या हातात दोरी देऊन आत्महत्येचा बनाव रचला. मात्र, पोलिस तपासात खुनाची बाब समोर आली. वाकड पोलिस अधिक तपास करीत आहेत.