पिंपरी : शाळा, महाविद्यालये, क्‍लासेस यांनी शुल्क निश्‍चितीबाबत पालकांकडून निश्‍चित धोरण ठरविणे गरजेचे आहे. निश्‍चित केलेले शुल्क टप्प्याटप्प्याने भरण्यासाठी आराखडा आखावा व त्यानुसार अंमलबजावणी करावी, यासाठी राष्ट्रवादी विद्यार्थी कॉंग्रेसकडून 'कोरोना शिक्षण शुल्कनीती अभियान' मोहीम राबविण्यात येणार असल्याचे राष्ट्रवादी विद्यार्थी कॉंग्रेसचे प्रदेशाध्यक्ष सुनील गव्हाणे यांनी सांगितले आहे. 

ताज्या बातम्यांसाठी डाऊनलोड करा ई-सकाळचे ऍप 

सध्या कोरोना महामारीचे संकट घोंघावत आहे. लॉकडाउनचे परिणाम गेल्या तीन महिन्यांपासून अर्थव्यवस्थेवर पडले आहेत. उद्योगधंदे पूर्ण क्षमतेने चालू नाहीत. अनेकांच्या हाताला काम नाही. पालक आणि शाळा महाविद्यालयेही त्याला अपवाद नाही. परिणामी शाळा महाविद्यालयांना उत्पन्नाचा स्रोत उरला नाही. विद्यार्थ्यांच्या सोयीसाठी आणि वार्षिक अभ्यासक्रमाचे नुकसान होऊ नये म्हणून काही ठिकाणी ऑनलाइन वर्ग चालू केले आहेत. मात्र, काही शाळा, महाविद्यालये अधिकचे शैक्षणिक शुल्क पालकांकडून जबरदस्तीने घेताना आढळून येत आहे. काही ठिकाणी पालकांकडे शैक्षणिक शुल्कासाठी तगादा लावला जात आहे. 

पिंपरी-चिंचवडच्या बातम्या वाचण्यासाठी येथे ► क्लिक करा

"कोणत्याही शैक्षणिक संस्थेने शुल्कवाढ करू नये. शक्‍य असेल तेवढे शुल्क शैक्षणिक संस्थांनी कमी करावे. कोणत्याही परिस्थितीत पालक किंवा विद्यार्थ्यांना शुल्क भरण्यासाठी सक्ती करू नये. केवळ शुल्क न भरल्याचे कारण दाखवत कोणत्याही विद्यार्थ्याला शैक्षणिक सुविधेपासून वंचित ठेवू नये. पालकांना शैक्षणिक संस्थांकडून नाहक त्रास झाल्यास विद्यार्थी कॉंग्रेस पदाधिकाऱ्यांच्या माध्यमातून आक्रमक भूमिका घेणार आहे.'' 
- सुनील गव्हाणे, प्रदेशाध्यक्ष, राष्ट्रवादी विद्यार्थी कॉंग्रेस