पिंपरी - सायबर क्राईममधून पोलिस उपायुक्त बोलत असल्याचे खोटे सांगून सॉफ्टवेअर इंजिनिअर तरुणीची साडेनऊ लाखांची ऑनलाईन फसवणूक केली. हा प्रकार निगडी, प्राधिकरण येथे घडला.

याप्रकरणी निगडी प्राधिकरण येथील २७ वर्षीय सॉफ्टवेअर इंजिनिअर तरुणीने फिर्याद दिली आहे. त्यानुसार अज्ञात आरोपीवर गुन्हा दाखल झाला आहे. आरोपीने फिर्यादी यांना फोन करून आपण फेडिक्स कुरियर कंपनीतून बोलत असून तुमच्या नावाचे मुंबई येथून तैवान करिता बेकायदेशीररित्या पार्सल जात असल्याचे सांगितले. त्यानंतर तो फोन दुसऱ्या व्यक्तीला जोडून दिला. त्यावर समोरील व्यक्तीने मी सायबर क्राईममधून पोलिस उपायुक्त (डीसीपी) अजयकुमार बन्सल बोलत असल्याची खोटी ओळख निर्माण केली.

फिर्यादीच्या बँक खात्याच्या डिटेल्स घेत त्यांच्या एसकेवायपीई अप्लिकेशनचा आयडी मागवला. त्यानंतर आयसीआयसीआय बँक खात्यातून इंलिगल ट्रान्झेक्शनचा प्रयत्न होत असून आपल्या बँक खात्यातील पैसे दुसऱ्याच्या खात्यात ट्रान्सफर करण्यास सांगितले. त्यानंतर आरबीआय बँकेचा खाते क्रमांक देवून त्यावर फिर्यादीस तीन ट्रान्झेक्शन करायला लावून फिर्यादीची ऑनलाईन तांत्रिक पद्धतीने नऊ लाख ६० हजार ९९९ रुपयांची फसवणूक केली.

आणखी एका सॉफ्टवेअर इंजिनिअर तरुणीला गंडा

हिंजवडीतील फेज दोन येथे राहणाऱ्या सॉफ्टवेअर इंजिनिअर तरूणीचीही तब्बल २० लाख १६ हजारांची ऑनलाईन फसवणूक झाली. त्यांनी दिलेल्या फिर्यादीनुसार अज्ञात आरोपींवर गुन्हा दाखल झाला आहे. आरोपींनी फिर्यादी यांना टास्क देण्याच्या कारणावरून फिर्यादीकडून वेळोवेळी युपीआय आयडी व बँक खात्यावरून २० लाख १६ हजार ८५६ रुपये ऑनलाइनद्वारे उकळले. त्यानंतर कोणताही मोबदला न देता फसवणूक करून या रकमेचा अपहार केला.