पिंपरी : श्‍वानदंश झालेल्या रुग्णांना महापालिकेच्या रुग्णालयात मोफत उपचार मिळतात. मात्र, आता यशवंतराव चव्हाण स्मृती रुग्णालयात (वायसीएम) केवळ कोविड रुग्णांवरच उपचार होत आहेत. त्यामुळे नागरिकांना खासगी रुग्णालयांत दोन हजारांचा भुर्दंड बसत आहे. 

ताज्या बातम्यांसाठी डाऊनलोड करा ई-सकाळचे ऍप 

पिंपरी-चिंचवडच्या बातम्या वाचण्यासाठी येथे ► क्लिक करा

शहरात दररोज कुत्रा चावण्याच्या दोन ते तीन घटना घडत आहेत. या रुग्णांवर उपचारासाठी महापालिकेच्या सगळ्याच रुग्णालयांत रेबीजची लस उपलब्ध आहे. मात्र, खासगी रुग्णालयात या लससाठी एका वेळेस 500 रुपये मोजावे लागतात. लसीचे चार डोस पूर्ण करावे लागतात. त्यामुळे रुग्णांना दोन हजार रुपयांचा खर्च येतो. सध्या वेगवेगळ्या टप्प्यातील रुग्णांसाठी महापालिकेच्या रुग्णालयात 800 डोस महिन्याला देण्यात येतात. आता वायसीएममध्ये उपचार मिळत नसल्याने लसीसाठीही थेट मेडिकलचा किंवा खासगी रुग्णालयाचा रस्ता दाखविला जातो. त्यामुळे शहरासह ग्रामीण भागातून उपचारासाठी येणाऱ्या सामान्य रुग्णांची परवड होत आहे. 

रेबीज म्हणजे काय? 
रेबीज हा विषाणूजन्य रोग आहे. पिसाळलेला कुत्रा चावल्यामुळे माणसांना हा रोग होतो. प्रसंगी मानवी मज्जासंस्थेला संसर्ग होऊन मनुष्य दगावतो. तोंड, मान, छाती, हात या ठिकाणी कुत्रा चावला असेल, तर या रोगाचा प्रादुर्भाव त्वरित होतो. तोंडातून लाळ गळणे, कोणतीही वस्तू चावणे, घाबरणे, जेवण न करणे, नाडीचे ठोके वाढणे ही लक्षणे दिसून येतात. 

प्रतिबंधात्मक उपचार 
माणसाला कुत्रा चावल्यानंतर त्याला त्वरित अँटिरेबिज लस देणे फायद्याचे ठरते. चावलेला भाग पाणी आणि साबणाने स्वच्छ करावा, तसेच त्यावर पट्टी बांधू नये. 

पुण्याच्या बातम्या वाचण्यासाठी येथे क्लिक करा

मोकाट कुत्र्यांमुळे जखमी होणाऱ्या रुग्णांवर उपचाराची जबाबदारी ही महापालिकेची आहे. त्यांनी केवळ गंभीर रुग्णच खासगीकडे पाठविले पाहिजे. खासगी रुग्णालयातील खर्च सामान्यांना परवडण्यासारखा नाही. त्यामुळे कुत्र्यांपासून सावध राहावे लागणार आहे. 
- प्रमोद शिंदे, नागरिक 

सध्या वायसीएम रुग्णालयात कोविड रुग्णांवर उपचार करण्यात येत आहेत. त्यामुळे सामान्य रुग्णांवर उपचार करण्यात येत नाहीत. कोरोनाचा संसर्ग होऊ नये, यासाठीही काळजी घेण्यात येत आहे. 
- राजेंद्र वाबळे, अधिष्ठाता, वायसीएम रुग्णालय