पिंपरी : राष्ट्रवादी काँग्रेसचे सर्वेसर्वा शरद पवार यांच्याबाबत सोशल मीडियावर आक्षेपार्ह पोस्ट करणे अभिनेत्री केतकी चितळे व नितीन भावे यांना चांगलेच भोवले आहे. या दोघांवर पिंपरी पोलिस ठाण्यात गुन्हा दाखल झाला आहे. याप्रकरणी राष्टवादी काँग्रेसच्या पिंपरी-चिंचवड शहर महिलाध्यक्षा कविता आल्हाट (रा. बोऱ्हाडेवाडी, मोशी) यांनी फिर्याद दिली आहे. चितळे व तिचा सहकारी ऍड. भावे यांनी शरद पवार यांना उद्देशून फेसबुकवर आक्षेपार्ह पोस्ट केली आहे. यामध्ये बदनामीकारक व मानहानीकारक मजकूर असल्याचे फिर्यादीत म्हटले आहे. दरम्यान, याप्रकरणी भारतीय दंड विधान कलम ५०५ (२), ५००, ५०१, १५३ (अ) व माहिती तंत्रज्ञान कायद्यांतर्गत गुन्हा दाखल झाला आहे. पिंपरी पोलिस अधिक तपास करीत आहेत.