पिंपरी : शहरात कोरोनाबाधितांची संख्या घटल्याने बिनधास्त झालेल्या नागरिकांनी मास्क आणि सॅनिटायझरचा वापर कमी केला आहे. त्यामुळे मास्क आणि सॅनिटायझरची विक्री घटून, २० टक्क्यांपर्यंत आली आहे. नागरिकांमध्ये बेफिकिरी वाढल्याने कोरोना प्रतिबंधक उपायांकडे दुर्लक्ष होत असल्याचे चित्र सर्वत्र पाहायला मिळत आहे.

कोरोना प्रतिबंधक लस घेतली आहे. आता आपल्याला काहीच होणार नाही, अशा आविर्भावात गेल्या काही महिन्यांपासून बिनामास्कचे वावरताना दिसत आहेत. हातात किंवा खिशात सातत्याने सॅनिटायझरची बाटली अथवा स्प्रेपान ८ वर

"शहरातील हॉटेल, मोठ्या संस्था, तसेच रुग्णालयांमध्ये सॅनिटायझरचा वापर सुरू आहे. मात्र, छोट्या दुकानांमध्ये सॅनिटायझर ठेवले जात असले, तरी त्याचा वापर होत नसल्याचे दिसते. ‘एन ९५’ मास्कची मागणी सप्टेंबरपासून कमी झाली आहे."

- विवेक तापकीर, उपाध्यक्ष केमिस्ट असोसिएशन ॲाफ पुणे डिस्ट्रिक्ट

मास्कची विक्री मंदावली

गेल्यावर्षी मार्चमध्ये कोरोनाचा संसर्ग सुरू झाला. त्यानंतर ‘एन ९५’, तसेच अन्य प्रकारच्या सर्जिकल मास्कचा वापर सुरू झाला. त्या वेळी ६० टक्क्यांवर सुरू असलेली विक्री मे महिन्यात १०० टक्क्यांपर्यंत वाढली. मात्र, त्याचा खप जूनपासून कमी होत गेला. जुलैमध्ये ७० टक्के असलेली ‘एन ९५’, मास्कची विक्री ऑक्टोबरपर्यंत ३० टक्क्यांपर्यंत खाली आली. त्या वेळी ‘एन ९५’ मास्क, तसेच सर्जिकल मास्क वापरण्याचे नागरिकांचे प्रमाण कमी झाले. आता ऑक्टोबरपासून मास्क, तसेच सॅनिटायझरचा खप आणखीनच कमी होऊन साधारणतः १५ ते २० टक्क्यांवर आला आहे, अशी माहिती पिंपरी-चिंचवड केमिस्ट असोसिएशनचे अध्यक्ष संतोष खिंवसरा यांनी दिली.

सॅनिटायझरची मागणी कमी

सुजय जेनेरिक स्वस्त औषध विक्रेते वर्षा भालेराव यांनी सॅनिटायझरचा वापर ५० ते ७० टक्क्यांपेक्षा कमी झाल्याचे निरीक्षण नोंदविले. त्या म्हणाल्या, ‘‘मे नंतर वापर कमी झाल्याने विक्री कमी झाली. रुग्ण वाढण्याची भीती कमी झाली आहे. परिणामी, सॅनिटायझर, मास्क उपलब्ध असले, तरी मर्यादित स्वरूपात त्याचा वापर सुरू आहे. सोसायट्यांकडूनही मागणी कमी झाली आहे.’’