घराच्या परिसरात खेळताना साडे तीन वर्षांच्या चिमुरडीच्या अंगावर लोखंडी गेट पडून तिचा मृत्यू झाल्याची धक्कादायक घटना समोर आली आहे. गिरीजा शिंदे असे या मृत मुलीचे नाव असून पिंपरी चिंचवडच्या बोपखेल परिसरात ही घटना घडली. समोर आलेल्या व्हिडीओत एक लहान मुलाने स्लाइडींग गेट ओढल्यानंतर ते मुलीच्या अंगावर पडल्याचे दिसत आहे.

मिळालेल्या माहितीनुसार ही घटना बुधवारची असून बोपखेल येथील गणेश नगर परिसरात घडली. बुधवारी दुपारच्या सुमारात गिरीजा आणि काही इतर मुले खेळत होते. एका मुलीसोबत गिरीजा धावत होती. मात्र एका मुलाने इमारतीचे लोखंडी स्लायडर गेट लावण्याचा प्रयत्न केला. मात्र गेटमध्ये बिघाड झालेला असल्याने ते गिरीजाच्या अंगावर पडले. थोड्या वेळाने एका व्यक्तीने पळत येऊन ते लोखंडी गेट उचलले.

यानंतर गिरीजाला उचलून रुग्णालयात दाखल करण्यात आले. मात्र डॉक्टरांनी तिला मृत घोषित केले. ही संपूर्ण घटना सीसीटीव्ही कॅमेऱ्यात कैद झाली. या घटनेत चिमुरडीचा जीव गेल्याने परिसरात हळहळ व्यक्त केली जात आहे.