पिंपरी : मुख्यमंत्री उद्धव ठाकरे यांच्या विषय आक्षेपार्ह विधान केल्याप्रकरणी केंद्रीय मंत्री नारायण राणे यांचा पिंपरी चिंचवड शहर शिवसेना व युवासेनेने निषेध केला. शिवसेनेने पिंपरी चौकात पुणे-मुंबई महामार्ग रोखला. तर, राणे यांच्या विरुद्ध गुन्हा दाखल करण्याची मागणी युवा सेनेने केली आहे. दरम्यान, शिवसेनेने भाजपच्या मोरवाडी कार्यालयावर मोर्चा नेऊन आंदोलन केले.

भाजपच्या जन आशीर्वाद यात्रेच्या दरम्यान रायगड येथे केंद्रीय मंत्री नारायण राणे यांनी मुख्यमंत्री उद्धव ठाकरे यांच्या विषयी एकेरी शब्दप्रयोग केला होता. अपशब्दही वापरले होते. त्याच्या निषेधार्थ पिंपरी चिंचवड शिवसेनेने पिंपरी चौकात आंदोलन केले. शहर प्रमुख सचिन भोसले यांच्या नेतृत्त्वाखाली आंदोलन झाले.

दरम्यान, युवा सेनेचे शहर प्रमुख विश्वजीत बारणे, शहर समन्वयक रुपेश कदम, माउली जगताप, राजेंद्र तरस, नीलेश हाके, प्रतिक्षा घुले यांनी पिंपरी चिंचवडचे पोलिस आयुक्त कृष्ण प्रकाश यांची भेट घेतली. मुख्यमंत्री उद्धव ठाकरे यांच्या विषयी अपशब्द वापरल्याबद्दल केंद्रीय मंत्री नारायण राणे यांच्या विरुद्ध गुन्हा दाखल करावा, अशा मागणीचे निवेदन त्यांनी दिले.