पिंपरी - विधानसभेचे विरोधी पक्षनेते अजित पवार यांच्या राजकीय घडामोडींच्या चर्चेला उधान आलेले असतानाच पिंपरी विधानसभा मतदारसंघाचे राष्ट्रवादी कॉंग्रेसचे आमदार अण्णा बनसोडे यांनी पुन्हा एकदा ‘आपण अजित पवार यांचे कट्टर समर्थक असून ते जो निर्णय घेतील त्या सोबत आपण राहू’, असे पत्रकारांशी बोलताना सोमवारी (ता. १७) सांगितले.

मागील वेळी अजित पवार यांनी पहाटेचा शपथविधी घेतला त्यावेळी सुरुवातीला त्यांच्याबरोबर अनेक आमदार होते. परंतु; पक्षांतरी विरोधी कारवाईचा बडगा पक्षाने व राष्ट्रीय अध्यक्ष, खासदार शरद पवार यांनी उगारल्यानंतर बहुतांश आमदार पुन्हा पक्षात आले होते. परंतु; शेवटपर्यंत बनसोडे ‘नॉट रिचेबल’ होते. शेवटी अजित पवार स्वगृही परतल्यावरच बनसोडेही त्यांच्याबरोबर विधी मंडळात आले होते.

आज पुन्हा अजित पवार यांच्याबाबत राजकीय घडामोडीच्या चर्चा सुरु झाल्यावर पत्रकारांनी बनसोडे यांना विचारले असता ते म्हणाले की, मी मागील काळातही अजित पवार यांच्याबरोबर होतो. मुंबईत दुपारनंतर मी जाणार असून त्यांच्याशी चर्चा करणार आहे. मी ‘दादां’चा कट्टर समर्थक आहे. ते जो निर्णय घेतील त्या सोबत मी राहणार आहे.