पिंपरी : पुणे मेट्रो प्रकल्पाचे काम गेल्या पाच वर्षांपासून सुरू आहे. त्याचे दोन मार्ग आहेत. त्यातील एक मार्ग पिंपरी चिंचवड शहराशी संबंधित आहे. पुण्यातील स्वारगेट ते पिंपरी चिंचवड मधील पिंपरी अर्थात पिंपरी चिंचवड महापालिका भवन (पीसीएमसी) असा हा मार्ग आहे. त्यातील दापोडीपासून महापालिका भवनापर्यंतच्या मार्गाचा समावेश शहरात होतो. या मार्गावर लवकरच प्रवासी वाहतूक सुरू होणार आहे. मेट्रो रेल सुरक्षा आयुक्तांनी गेल्या महिन्यात त्याची पाहणी केली असून प्रवासी वाहतुकीस मान्यता दिली आहे, असे मेट्रोच्या अधिकाऱ्यांनी कळविले आहे.

मेट्रोच्या पीसीएमसी ते स्वारगेट आणि वनाझ ते गरवारे या दोन मार्गिका आहेत. पीसीएमसी ते स्वारगेट ही ११.४ किलोमीटरची मार्गिका आहे. त्यामध्ये १४ स्थानके असणार आहेत. पीसीएमसी ते स्वारगेट या मार्गिकेमध्ये शिवाजीनगर ते स्वारगेट हा सहा किलोमीटर मार्ग भूमिगत आहे. यामध्ये पाच स्थानके असतील. पीसीएमसी ते शिवाजीनगर हा उन्नत मार्ग आहे. त्यावर आठ स्थानके आहेत. वनाझ ते रामवाडी हा १५.७ किलोमीटरचा मार्ग आहे. तो पूर्णतः उन्नत आहे. त्यामध्ये १६ स्थानके आहेत.

पीसीएमसी ते फुगेवाडी हा सात किलोमीटर मार्ग आहे. त्याची पाहणी मेट्रो रेल्वे सुरक्षा आयुक्तांनी जानेवारी महिन्यात केली होती. त्यांनी मार्गिका प्रवाशांसाठी खुली करण्यास मान्यता दिली आहे. वनाझ ते गरवारे या पाच किलोमीटर मार्गिकेचीही पाहणी मेट्रो रेल्वे सुरक्षा आयुक्तांनी फेब्रुवारी २०२२ मध्ये केली आहे. ही मार्गिकाही प्रवाशांना खुली करण्यास त्यांनी मान्यता दिली आहे.

वनाझ ते गरवारे व पीसीएमसी ते फुगेवाडी या मार्गिकांना मेट्रो रेल सुरक्षा आयुक्तांची मान्यता मिळाली आहे. त्यामुळे १८ किलोमीटरच्या या मार्गावर १० मेट्रो स्थानके आहेत. हे मार्ग प्रवाशांसाठी लवकरच खुले होणार आहेत. टप्प्याटप्प्याने उर्वरित २१ किलोमीटर मार्ग एक वर्षाच्या आत खुला करण्यात येणार आहे, असे मेट्रोच्या अधिकाऱ्यांनी कळविले आहे.