भोसरी : येथे जनता कर्फ्यूचा फज्जा उडाल्यानंतर पोलिसांद्वारे सायंकाळी पाचच्या सुमारास भोसरीत फेरी काढून दुकानदारांना दुकाने बंद करण्यास भाग पाडल्याने सायंकाळी पाचनंतर भोसरी परिसरात बंद पाळण्यात आला.

ताज्या बातम्यांसाठी डाऊनलोड करा ई-सकाळचे ऍप   

हेही वाचा- जनता कर्फ्यू असूनही भोसरी परिसरात हे काय चाललंय?

पिंपरी-चिंचवड महापालिकेने रविवारी (ता. ५) जनता कर्फ्यू लागू केला होता. मात्र, नागरिक व दुकानदार यांच्यामध्ये याविषयी जनजागृती झाली नसल्याने सकाळपासूनच सर्वच दुकाने सुरू राहिल्याने कर्फ्यूचा फज्जा उडाला. मात्र, सायंकाळी पाचच्या सुमारास भोसरी पोलिसानी फेरी काढून दुकाने बंद करण्याचे आवाहन केले. त्याचप्रमाणे दुकाने सुरू राहिल्यास कारवाई करण्याचीही तंबी देण्यात आली. त्यामुळे भोसरी परिसरातील दिघी रस्ता, पीएमटी चौक, आळंदी रस्ता, चांदणी चौक ते लांडेवाडी चौकापर्यंतचा रस्ता, पुणे-नाशिक महामार्गाच्या सेवा रस्त्यावर बसणारे विविध वस्तू विक्रेते यांनी दुकाने बंद केली.

पुण्याच्या बातम्या वाचण्यासाठी येथे ► क्लिक करा

पोलिसांनी दुकाने सुरू राहिल्यास कारवाई करण्याचे निर्देश दिल्यानंतर दुकानदारांनी दुकानाबाहेरील वस्तू दुकानामध्ये घेण्यास लगबग सुरू केली. त्याचप्रमाणे रस्त्यावर बसणाऱ्या भाजी-फळे विक्रेत्यांचीही भाजी उचलण्यासाठी धावपळ सुरू होती. तर काही भाजी विक्रेत्यांनी भाजी विक्री जलद व्हावी, यासाठी भाजी स्वस्त दरात विकण्यास सुरुवात केली. त्यामुळे स्वस्तातील भाजी घेण्यासाठीही काही वेळ नागरिकांनी गर्दी केली होती. मात्र, जनता कर्फ्यू असल्यामुळे भोसरी पोलिसांनी सकाळीच फेरी मारून दुकानदारांना दुकाने बंद करण्याच्या सूचना दिल्या असत्या, तर आजचा जनता कर्फ्यू यशस्वी झाला असता, अशी प्रतिक्रिया काही नागरिकांनी दिली.  

पिंपरी-चिंचवडच्या बातम्या वाचण्यासाठी येथे ► क्लिक करा

वाहनांची गर्दी...

महापालिकेने जनता कर्फ्यू लागू केल्यानंतर नागरकांनी घरी राहणे अपेक्षित होते. मात्र, भोसरी परिसरात नागरिक घराबाहेर आल्याने वाहनांची गर्दी झाली होती. त्याचप्रमाणे खरेदीसाठी आळंदी रस्ता, पीएमटी चौक, दिघी रस्ता आदी भागात आलेल्या ग्राहकांमुळे वाहनांच्या दुतर्फा रांगा लागलेल्या दिसून आल्या. जनता कर्फ्यू जाहीर झाल्यानंतर रस्त्यावर येणाऱ्या वाहनांवर पोलिसांद्वारे निर्बंध लावण्यात येणे गरजेचे असताना, अशा वाहनांवर कोणत्याही प्रकारची कारवाई न झाल्याने नागरिकांमधून नाराजी व्यक्त केली.