पिंपरी - पुणे शहर (Pune City) व ग्रामीण हद्दीतील पोलिस ठाणे (Police Station) मिळून स्वतंत्र पिंपरी-चिंचवड पोलिस आयुक्तालय अस्तित्वात आले, तसेच काही ठाण्यांचे विभाजन केल्याने ठाण्यांची संख्या वाढली. मात्र, अद्यापही बहुतांश पोलिस ठाण्यात ‘लॉकअप’ (Lockup) नसल्याने आरोपी (Accused) ठेवताना पोलिसांची धावपळ होत आहे.

आयुक्तालयात सध्या पिंपरी, चिंचवड, सांगवी, भोसरी, निगडी, वाकड, हिंजवडी, देहूरोड, तळेगाव दाभाडे, तळेगाव एमआयडीसी, आळंदी, चाकण, चिखली, दिघी, भोसरी एमआयडीसी असे पंधरा पोलिस ठाणे असून आणखी काही नवीन ठाण्यांची निर्मिती होत आहे. मात्र, सध्या केवळ देहूरोड, पिंपरी, दिघी, भोसरी, चाकण येथेच आरोपींना ठेवण्यासाठी ‘लॉकअप’ आहेत. त्यामुळे इतर पोलिस ठाण्यात दाखल गुन्ह्यातील आरोपींसह इतर शाखेने पकडलेल्या आरोपींनाही येथीलच ‘लॉकअप’ला ठेवावे लागते.

आरोपींना ताब्यात घेतल्यानंतर न्यायालयात हजर करणे, कोठडी मिळाल्यानंतर पुन्हा ‘लॉक अप’ ला आणण्यासाठी दूर अंतरावरून आरोपींची ने-आण करावी लागते. यामध्ये जोखीम असते. दरम्यान, थोडा जरी निष्काळजीपण झाल्यास आरोपी पसार होण्याचीही भीती असते. यामुळे संबंधित ठाण्यात ‘लॉक अप’ असल्यास सोयीचे ठरते. मात्र, ठाण्यात स्वतंत्र ‘लॉक अप’ नसल्याने पोलिसांना कसरत करावी लागते. तळेगाव एमआयडीसी, तळेगाव दाभाडे या भागातील आरोपी देहूरोड येथे, चिखली, निगडी, चिंचवड, वाकड, सांगवी आदी परिसरातील आरोपी पिंपरी ठाण्यासह इतर ठाण्यात तर भोसरी एमआयडीसी, सांगवी येथील आरोपी भोसरी ठाण्यासह इतर ठाण्यात ठेवले जातात. तर आळंदी व इतर ठिकाणचे आरोपी दिघी ठाण्यात ठेवले जातात.

गुन्ह्यांची संख्या वाढतेय

नव्याने आयुक्तालय अस्तित्वात आले. आयुक्तालयाच्या हद्दीतील लोकसंख्या अधिक असल्याने ठाण्यासह चौकीचीही संख्या वाढली. दरम्यान, गुन्हेही वाढल्याने आरोपींची संख्याही वाढते. त्यामुळे अनेकदा पूर्वीची लॉकअप अपुरी पडतात. यामुळे पोलिसांना धावपळ करावी लागते. दरम्यान, वाकडसह इतर काही ठाण्यांत लॉकअप बांधून तयार आहेत, मात्र त्यास अद्याप मंजुरी मिळालेली नाही.