कामशेत - न्यायालयीन कोठडीत असलेल्या आरोपीचा जामीन करण्यासाठी पाच लाखांच्या लाचेची मागणी करणाऱ्या कामशेत पोलिस ठाण्याचे निरीक्षक, सहाय्यक निरीक्षकासह एका कर्मचाऱ्याला एक लाखांची लाच स्वीकारताना लाचलुचपत प्रतिबंधक विभागाने रंगेहात पकडले. ही कारवाई शनिवारी (ता. ६) कामशेत येथे करण्यात आली. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

लाचलुचपत प्रतिबंधक विभागाच्या पोलिस निरीक्षक अलका सरग यांनी दिलेल्या माहितीनुसार, पुणे जिल्हा मध्यवर्ती सहकारी बँकेचे माजी संचालक बाळासाहेब नेवाळे यांना गोवित्री संस्थेतील बनावट मतदार यादीत फसवणूक केल्याप्रकरणी अटक केली आहे. त्यांना वडगाव न्यायालयाने २५ फेब्रुवारीपर्यंत पोलिस कोठडी दिली. मात्र, त्यांना जामिनाबाबत मदत करण्यासाठी पोलिसांनी पाच लाखांच्या लाचेची मागणी केली होती. त्यापैकी अडीच लाख रुपये दिले होते. त्यानंतर नेवाळे यांना १४ दिवसांची न्यायालयीन कोठडी सुनावली.

पोलिसांच्या अंगावर मोटार घालून वीस फूट नेले फरफटत

नेवाळे यांचा जामीन करण्यासाठी पोलिस निरीक्षक अरविंद चौधरी, सहाय्यक निरीक्षक प्रफुल्ल कदम व कर्मचारी महेश दौंडकर यांनी उर्वरित अडीच लाख रुपयांच्या लाचेची मागणी केली. याबाबत मावळ पंचायत समितीचे उपसभापती दत्तात्रेय शेवाळे यांनी लाचलुचपत प्रतिबंधक विभाग पुणे कार्यालयात तक्रार दिली. त्यानुसार लाचलुचपत विभागाने शनिवारी या तिघांना एक लाख रुपये स्वीकारताना अटक केली. आरोपींवर कामशेत पोलिस ठाण्यात गुन्हा दाखल केला. लाचलुचपत प्रतिबंधक विभागाचे पोलिस अधीक्षक राजेंद्र बनसोडे, अप्पर अधीक्षक सूरज गुरव यांच्या मार्गदर्शनाखाली निरीक्षक अलका सरग, सुनील क्षीरसागर, कर्मचारी वैभव गिरीगोसावी, किरण चिमटे यांनी सापळा रचून कारवाई केली.

Edited By - Prashant Patil