पिंपरी : महापालिकेच्या रुग्णालयात एका नगरसेवकाने घातलेल्या गोंधळाचे पडसाद मंगळवारी वैद्यकीय क्षेत्रात उमटले. अनेक डॉक्‍टर व त्यांच्या संघटनांनी या प्रकाराचा व संबंधित नगरसेवकाचा निषेध केला आहे. तसेच, यानिमित्ताने सोशल मीडियावर आपापल्या अकांउटवर वस्तुस्थितीही मांडली आहे.

ताज्या बातम्यांसाठी डाऊनलोड करा ई-सकाळचे ऍप 

पिंपरी-चिंचवडच्या बातम्या वाचण्यासाठी येथे ► क्लिक करा
 
वायसीएम हॉस्पिटल हे कोविड समर्पित आहे. गेल्या चार महिन्यांपासून याठिकाणी सर्व डॉक्‍टर प्रामाणिक रुग्णसेवा देत आहेत. मात्र, सतत राजकीय नेते, त्यांचे कार्यकर्ते रुग्णालयीन कामकाजात हस्तक्षेप केला जात आहे. याचाच कहर म्हणजे एका नगरसेवकाने आणि काही कार्यकर्त्यांनी कोरोना कक्षात रुग्णांमध्ये मिसळत गोंधळ घातला. तसेच डॉक्‍टरांना शिवीगाळ करत अंगावर धावून हल्ला करण्याचा प्रयत्न केला. कोणतेही वैद्यकीय ज्ञान नसलेल्या अशा राजकीय कार्यकर्त्यांकडून अमूक एका रुग्णास भरती करा, ऑक्सिजन बेड द्या, आयसीयू बेड द्या, व्हेंटिलेटर लावा, असे उपचाराबाबतचे निर्णय डॉक्‍टरांवर थोपवले जात आहेत. यामुळे उपचारात मोठ्या प्रमाणावर अडचणी व विसंगती निर्माण होत आहेत. अशाच राजकीय हस्तक्षेपामुळे अनावश्‍यक रुग्णांची भरती होऊन गरजूंना बेड मिळत नाहीत. त्यामुळे उपचारास विलंब लागत आहे. अशा राजकीय आशीर्वादाने भरती झालेल्या रुग्णांच्या अवास्तव मागण्या पूर्ण करण्यात रुग्णालयीन कर्मचाऱ्यांचा वेळ व ऊर्जा व्यर्थ जात आहे. 

पुण्याच्या बातम्या वाचण्यासाठी येथे क्लिक करा

वेळोवेळी महापालिका प्रशासनाकडे व रुग्णालय प्रशासनाकडे मागणी व पाठपुरावा करूनही डॉक्‍टर व रुग्णालयीन कर्मचाऱ्यांचे वेतन, अपुरे डॉक्‍टर, परिचारिका, वॉर्डबॉय आदी मनुष्यबळ, रुग्णसेवा देताना बाधित झालेल्या डॉक्‍टर व रुग्णालयीन कर्मचारी यांच्यावर उपचार, रुग्णसेवेसाठी आवश्‍यक वैद्यकीय साधनसामुग्रीची कमतरता, निवासी डॉक्‍टरांच्या राहण्याची व्यवस्था व जेवणाची सोय आदी मागण्यांवर केवळ आश्‍वासने दिली गेली आहेत. त्यामुळे सर्व डॉक्‍टरांमध्ये निराशेचे व भीतीचे वातावरण आहे, अशी व्यथा डॉक्‍टरांनी मांडली आहे.