वडगाव मावळ (पुणे) : वडगाव येथील प्रवेशद्वाराजवळ मुंबई-पुणे महामार्गाच्या साईडपट्टीला पडलेल्या खड्ड्यांमुळे वारंवार अपघात होत होते. त्यामुळे वडगाव शहर भाजयुमोचे अध्यक्ष रमेश ढोरे यांनी आयआरबी कंपनीकडून दुरुस्तीची वाट न पाहता स्वखर्चातून मुरूम टाकून अपघातग्रस्त जागेचे सपाटीकरण केले.

ताज्या बातम्यांसाठी डाऊनलोड करा ई-सकाळचे ऍप 

वडगाव येथील प्रवेशद्वाराजवळील कॉर्नरला महामार्गाला साईडपट्ट्या खचल्याने तेथे मोठे खड्डे पडले होते. पुण्याहून एमआयडीसीकडे जाण्यासाठी येथे वळण घेणारी वाहने बाजूच्या खड्ड्यात जाऊन अपघात होत होते. महामार्गावर टोलवसूली व महामार्गाची देखभाल करणाऱ्या आयआरबी कंपनीने येथे वारंवार होणारे अपघात व नागरिकांची सुरक्षितता लक्षात घेऊन साईडपट्ट्या भरण्याचे काम त्वरित करावे, अशी मागणी भाजयुमोने दोन दिवसांपूर्वी केली होती. 

पिंपरी-चिंचवडच्या बातम्या वाचण्यासाठी येथे ► क्लिक करा

या बाबत 'सकाळ'मध्ये वृत्त प्रसिद्ध झाले होते. भाजयुमोचे शहराध्यक्ष रमेश ढोरे यांनी आयआरबीकडून दुरुस्तीची वाट न पाहता स्वखर्चातून दोन डंपर मुरूम टाकून जेसीबीने या अपघातग्रस्त जागेचे सपाटीकरण केले. या कामामुळे वाहनचालकांचा अडचणीचा तात्पुरता प्रश्न सुटला असला, तरी आयआरबी कंपनीने  लवकरात लवकर संपूर्ण साईडपट्टीचे काम करावे, अशी मागणी त्यांनी केली. मावळ भाजपचे प्रसिध्दी प्रमुख अनंता कुडे, शहर अध्यक्ष किरण भिलारे, नगरसेवक प्रविण चव्हाण, बजरंग दल मावळ प्रमुख अमोल पगडे, कार्याध्यक्ष शेखर वहिले, हेमंत काकडे आदींच्या उपस्थितीत हे दुरुस्तीचे काम करण्यात आले.

पुण्याच्या बातम्या वाचण्यासाठी येथे क्लिक करा