वडगाव मावळ : मावळ तालुक्यात आढळलेल्या १६ कोरोना रुग्णांपैकी सहा रुग्ण कोरोनामुक्त झाल्याची माहिती तालुका आरोग्याधिकारी डॉ. चंद्रकांत लोहारे यांनी दिली. कोरोना रुग्णांच्या संपर्कातील ७९ व्यक्तींचे अहवालही निगेटिव्ह आले असल्याचे त्यांनी सांगितले.                    

ताज्या बातम्यांसाठी डाऊनलोड करा ई-सकाळचे ऍप                 

माळवाडी, तळेगाव स्टेशन, चांदखेड, नागाथली, अहिरवडे, वेहेरगाव येथे आढळलेले रुग्ण कोरोनामुक्त झाले आहेत. त्यांना रुग्णालयातून घरी सोडण्यात आले आहे. मावळ तालुक्यात तळेगाव स्टेशन येथे पहिला व माळवाडी येथे दुसरा रुग्ण आढळला होता. लॉकडाउन शिथिल झाल्यानंतर तालुक्यात बाहेरून विशेषतः मुंबईवरून येणाऱ्यांची संख्या वाढत गेली व त्या बरोबर तालुक्यात कोरोना रुग्णांची संख्याही वाढली. महिनाभरात शहरी भागात सहा तर ग्रामीण भागात दहा रुग्ण आढळून आले. अहिरवडे, नागाथली, वेहेरगाव, चांदखेड, घोणशेत, कामशेत, परंदवडी, तळेगाव दाभाडे, खंडाळा या गावांमध्ये सलग रुग्ण आढळले. 

पिंपरी चिंचवडच्या बातम्या वाचण्यासाठी येथे ► क्लिक करा

चांदखेड येथील रुग्णाच्या संपर्कातील चार व खंडाळा येथील रुग्णाच्या संपर्कातील एका व्यक्तीचा अहवालही पॉझिटिव्ह आला होता. परंतु, गेल्या चार दिवसांपासून काहीसा दिलासा मिळाला आहे. १६ पैकी सहा रुग्ण कोरोनामुक्त झाले आहेत. कोरोना रुग्णांच्या हाय रिस्क संपर्कातील ७९ व्यक्तींचे अहवालही निगेटिव्ह आले आहेत. सध्या कोणताही तपासणी अहवाल पेंडिंग नसल्याची माहिती डॉ. लोहारे यांनी दिली.    

पुण्याच्या बातम्या वाचण्यासाठी येथे ► क्लिक करा                             

बाहेरच्यांची आवक सुरूच                      
लॉकडाउनमध्ये शिथिलता आल्याने व स्थलांतराला शासनानेच मुभा दिल्याने तालुक्यात बाहेरून येणाऱ्यांची आवक सुरूच आहे. दररोज सरासरी शंभर ते सव्वाशे व्यक्ती येत आहेत. आत्तापर्यंत ९ हजार ७०५ व्यक्ती आल्या आहेत. त्यात मुंबईहून आलेल्यांची संख्या अधिक आहे. बाहेरून आलेल्या ७ हजार ३११ व्यक्तींचा होमक्वारंटाइनचा कालावधी पूर्ण झाला आहे. सध्या २ हजार ४९४ व्यक्ती होमक्वारंटाईन आहेत.